Mauro İkardinin zədələnməsindən sonra nə Paulo Dibalanı, nə də Corc Mikautadze heyətinə qata bilən ''Qalatasaray'' İndi də diqqətini başqa forvarda - PSJ və Fransa yığmasının üzvü Randal Kolo Muaniyə yönəldib.

İstanbul nəhəngi alternativ variantlardan biri olan Kolo Muaniyə görə PSJ-yə rəsmi təklif irəli sürüb. 26 yaşlı forvardın parislilərin baş məşqçisi Luis Enrike ilə münasibətləri gərgindi. Bu üzdən onun komandadan ayrılması hər iki tərəfin lehinə işləyə bilər. ''Cim-Bom'' da bu durumdan yararlanmaq istəyir. ''Sarı-qırmızılar'' Kolo Muanini 6 aylıq icarəyə götürmək istəyir. PSJ icarə haqqı tələb etmir. Amma parislilər futbolçunun 6 aylıq maaşının, yəni 4 milyon avronun ''Qalatasaray'' tərəfindən ödənilməsini istəyir. Türkiyə çempionu isə bu məbləğin mümkün qədər aşağı salınması üçün danışıqları davam etdirir.

2023-ün yayında ''Ayntraxt''dan 95 milyon avroya transfer edilən və PSJ ilə 2028-ə qədər müqaviləsi olan forvarda İngiltərə və İtaliya klubları ilə yanaşı ''Bavariya'' da maraq göstərir. DÇ-2022-nin finalında Emiliano Martines ilə təkbətək çıxdığı epizodu boşa verməsi ilə yaddaşlarda iz buraxan Kolo Muani bu mövsüm keçirdiyi 15 rəsmi oyunun cəmi 2-də start heyətində meydana çıxıb və 2 qol vurub. Xatırladaq ki, ''Qalatasaray'' İkardini də PSJ-dən transfer edib.

ƏLİ