1995-ci il sentyabrın 6-da Oserdə keçirilən Fransa – Azərbaycan oyununun nəticəsi, məlum 0:10 heç vaxt qaysaq bağlamayacaq yaradı. Unutmaq istəyirik, yığmanın və “Qarabağ”ın şanlı qələbələrini xatırlayırıq, ancaq yenə də alınmır. Güman ki, Azərbaycan futbolunun hansısa nəsli Fransadan həmin acı məğlubiyyətin səbəbini çıxacaq. Bəs hesab 0:10 olmaya bilərdimi?

Üstündən təxminən 20 il ötəndən sonra mən o oyunun videoyazısına baxa bildim. Rəqib hesabı açana qədər, hətta bütövlükdə ilk yarı boyunca yığmamız yetərincə yaxşı oynayır, maraqlı kombinasiyalar qurur, əks-hücumlara çıxır. Bir sözlə, 0:10-dan xəbər verən hansısa əlamət yoxdu. Amma 90-cı dəqiqədə tabloda artıq 10:0 hesabı yanırdı. Bu oyundan danışırıqsa, lənətlənəsi adamlardan biri də Valeri Qazzayevdi. Azərbaycanı və azərbaycanlı futbolçuları heç sevməyən osetin mütəxəssis. Onun çalışdırdığı “Alaniya” 1995-ci ildə Rusiyada çempionluq uğrunda mübarizə aparırdı. Avqustun 30-da keçirilən “Alaniya” – “Krılya Sovetov” oyunu 1:1 hesabıyla bitmiş, vladiqafqazlıları məğlubiyyətdən həmyerlimiz Nazim Süleymanov xilas etmişdi. Məhz bu oyundan sonra “Alaniya”nın düşərgəsinə Bakıdan – AFFA-dan Süleymanovun yığmaya çağrılmasıyla bağlı faks gəldi. Ağasəlim Mircavadov oyun da adını heyətə salmışdı. Qazzayev iki ayağını bir başmağa dirədi ki, “səni yığmaya buraxmayacam, çempionatda və avrokubokda vacib oyunumuz var, sənin federasiya ilə yox, klubla müqavilən var, AFFA ilə məsələni özüm yoluna qoyacam”.

Doğrudan da, “Alaniya” sentyabrın 7-də çempionatda “Torpedo”, 12-də isə UEFA kubokunda “Liverpul” ilə qarşılaşmalıydı. Sonrası məlumdu, Azərbaycan səfərdə 0:10 uduzdu, Qazzayev AFFA-nı razı sala bilmədi, əksinə, məhz Fuad Musayevin UEFA-ya şikayəti əsasında Süleymanova Rusiyada ikioyunluq cəza kəsildi.

Əlbəttə, mən onu da yüzdəyüz iddia etmirəm ki, Nazim bəy həmin gün heyətdə olsaydı, 0:10 hesabı qeydə alınmayacaqdı. Bəlkə daha böyük hesabla uduza bilərdik. Ancaq bütün bu düşüncələr məhz Qazzayevin 1995-ci ilin sentyabrında fransızlara “ayı xidməti” göstərməsi ilə bağlı reallığı dəyişmir. Bilənlər bilir ki, onun Azərbaycan futbolu üçün başqa “xidmətləri” də olub.

ORXAN