“Əslində bu haqda çox danışmaq istəmirəm. Amma həmin qarşılaşmada bizim və Argentinanın vurduğu qollara baxsaq, ortaya bəzi suallar çıxır. Eyni zamanda bəzi argentinalı oyunçuların matçboyu özlərini qeyri-etik aparması və bunun qarşılığında heç bir cəza almamaları da ortaya müəyyən suallar çıxarır. Fikrimcə, Niderlandla Argentinanın oyununun nəticəsi əvvəlcədən müəyyənləşdirilmişdi! Bunun Messinin dünya çempionluğunu qazanması üçün edildiyini düşünürəmmi? Bəli, məhz belə düşünürəm”. Dünya futbolunda xüsusi nüfuza malik olan və məşqçi karyerası boyunca Çempionlar Liqası da daxil olmaqla 20 titul qazanan 72 yaşlı mütəxəssisin bu sözləri, gözlənildiyi kimi, futbol dünyasında heç də birmənalı qarşılanmadı. Maraqlıdı ki, hətta həmin oyunun iştirakçısı olmuş Niderland yığmasının aparıcı üzvlərindən biri belə Van Qalın fikirləri ilə razılaşmayıb. Söhbət “Liverpul”lu Vircil van Diykdən gedir: “Bəli, Van Qalın sözlərini eşitmişəm. Bunu şərh etmək istəmirəm. Yalnız onu deyə bilərəm ki, onun söylədikləri ilə qətiyyən razı deyiləm. Bu, sırf onun fikridi. Hər kəs öz fikrini söyləməkdə azaddı”.