Son iki ilə qədər “Formula-1” yarışlarında dəbi müəyyənləşdirən Lüis Hemilton artıq kölgəyə çəkilib və ya buna məcbur olub.

“Mersedes”in britaniyalı pilotu 2-ci yeri tutduğu ABŞ “Qran-pri”sinin ardından jurnalistlərin diqqət mərkəzinə düşüb.

- Ostin trassında cari mövsümdə ilk qələbəyə yaxın idiz. Güman etmək olar ki, hadisələrin belə axarına görə sevinirsiz.

- Yarışın hansısa məqamında Maks Ferstappenə çox yaxınlaşmağım əladı. Əslində belə sürət yığmağa qadir olacağımızı bilmirdik. Düşünürəm ki, Maks mübarizənin ilk mərhələsində tempi qaldırdı, ona çatmaq çox çətin idi. Ancaq yarışın ikinci mərhələsində - trassa təhlükəsizlik maşını çıxandan sonra ona çox yaxınlaşa bildim. Aqressiv hərəkət etdik, komandamla qürur duyuram. Texniki yeniliklərini iş başında sınamaq üçün hər kəs maksimum bacarığını ortaya qoydu. Hansısa məqamda düşündüm ki, liderliyi qoruya biləcəyik, ancaq çox güman, “Red Bull”un əlavə “Medium” təkər komplekti bu komandaya bizlə müqayisədə bir qədər sürətli getməyə imkan verdi.

- Texniki yeniliklər haqda nə deyərdiz? Maşının sürətinin artdığı hiss olunurmu? Və bu məqam qalan yarışların nəticələrinə necə təsir edə bilər?

- Sözün düzü, bunu demək hələ çətindi. Şübhə etmirəm ki, komandamız rəqiblərlə müqayisədə “artırıb-artırmadığımızı” dəqiq bilir. Ancaq yeniliklərin bizə yardım etdiyinə əminəm, düz istiqamətdə atılan addımdı. Hər halda, “Red Bull”un maşını düz yollarda çox sürətlidi. Güman edirəm ki, rəqib bizi sürətdə təxminən 8 km/saat qabaqlayır.

- Ostində yenidən qələbə uğrunda mübarizə apara bildiz. Belə əminlik varmı ki, mövsümün sonuna qədər, heç olmasa, bir mərhələni qazana bilərsiz? Və qalan trasslardan hansı sizə və maşınınıza daha uyğundu?

- Düşünürəm ki, realist kimi qalmalıyıq. “Red Bull”un maşını il boyunca çempionatda ən sürətli oldu və yenə də belədi. Siz ki anlayırsız, indi olduğumuz mövqeyə çoxlu yarışdan, müxtəlif xarakterli problemləri həll edəndən sonra gəlib çıxmışıq. Təmiz sürətdən danışırıqsa, “Red Bull” bütün həftəsonu boyunca bizdən sürətli idi. Ostində belə oldu, qalan üç mərhələdə də belə olacaq. Hansısa xüsusi hadisə olmasa, çətin ki, onlarla rəqabət aparmağa sürətimiz çata. Ancaq gücümüz daxilində olan işləri görürük, sürəti artırmağa çalışırıq. Baxın, mən nəyi nəzərdə tuturam... Maks 11 saniyə sürən pit-stopdan sonra Leklerdən arxada qalsa da, maşını necə sürətlidisə, ardından 6 saniyə geriliyi aradan qaldırdı, Lekleri də ötdü, məni də və finişə bir neçə saniyə öndə çatdı. Bu isə o deməkdi ki, Ferstappenuin maşını möhtəşəm sürətə malikdi. Bununla belə, bizim üçün də müsbət məqamlar çox idi, düzünə qalsa, bu mövsümdəki ən yaxşı yürüşlərimizdən birini keçirdik.

- Maksın cari mövsümdəki dominantlığını necə qiymətləndirirsiz? Ferstappen erası başlayır, yoxsa belə hesab edirsiz ki, gələn il ona çatmaq imkanınız olacaq?

- Bu haqda danışmaq üçün hələ çox tezdi. “Red Bull” gələn mövsümün əvvəlində də dominantlığı davam etdirsə, onda hər şey mümkündü. Ancaq “Ferrari” təsnifat mərhələlərində bu komandanı qabaqlayır və yürüş tempini də artırsa, “Red Bull” ilə mübarizəyə tam hazır olacaq. Düşünürəm ki, bizə bunun üçün daha ciddi tərəqqiyə nail olmaq lazımdı. Əlbəttə, bir qədər çətindi, ancaq ümid edirik ki, bu vəzifənin öhdəsindən gəlmək, hər halda, mümkündü.