Paskal Numadan Haci ilə bağlı qalmaqallı etiraf
Türkiyə futbolunda böyük iz buraxmış ''Beşiktaş''ın sabiq forvardı Paskal Numa ''Qalatasaray'' və Rumıniya futbolunun əfsanəsi George Haci ilə bağlı qalmaqallı iddia səsləndirib.
"Football-plus.az" xəbər verir ki, Numa GSP nəşrinə verdiyi açıqlamada 2000-ci ildə oynanılan ''Beşiktaş'' - ''Qalatasaray'' derbisində Haci ilə aralarında baş verən olaydan danışıb. Numa hətta həmin gün paltardəyişmə otağına aparan dəhlizdə Hacini vurduğunu da qeyd edib:
''Əvvəlcə mənə, sonra anama qarşı nalayiq ifadə işlətdi. Özünü mafia adlandırdı. Məni ən çox qəzəbləndirən də məhz bu oldu. Dəhlizdə onu necə döydüyümü yəqin ki, gözəl xatırlayır. İndiyə qədər də o anı unuda bilmirəm. Haci həmin gün mənə qarşı həm də irqçi sözlər dedi. Ondan fərqli olaraq həmyerlisi Popesku əsil centlmen insan idi. Sanki bir mələk idi. Ən çox hörmət etdiyim məşqçilərin başında Mirça Luçesku gəlir. Məni ''Beşiktaş''a məhz o gətirdi. Həyatda özümü sübut etmək üçün cəmi 2 faiz şansım qalmışkən mənə güvəndi''.
Məqalənin sonunda qeyd olunub ki, olayla bağlı qarşı tərəfdən fikir öyrənmək üçün qəzetin əməkdaşları George Haciyə zəng vurmalarına və ''vatsapp'' ilə yazmalarına baxmayaraq onlara cavab verilməyib. Daha sonra Hacinin sahibi olduğu ''Farul'' vasitəsilə görüş tələb edilib. Amma klubdan da heç bir cavab gəlməyib.
Nəşr Hacinin cavab verəcəyi təqdirdə xəbərin yenilənəcəyini bildirib.
Digər xəbərlər
