Çempionlar Liqasının 2-ci turunun "Qarabağ" - "Kopenhagen" matçında (2:0) yaşanan xoşagəlməz olaylardan xəbərdarsız.

Xatırladaq ki, matçı stadiondan izləməyə gələn minlərlə azarkeş tribunadakı yerini vaxtında tuta bilmədi. Stadiona daxil olmaq uğrunda mübarizə azı 25 dəqiqədə davam etdi. Belədə bileti ola-ola, oyunun müəyyən hissəsini qaçıranlar da oldu, biletsiz olduğu halda içəri keçənlər də. Necə deyərlər, "ara qarışdı, məzhəb itdi". Qarışıqlıq zamanı həm azarkeşlərin öz aralarında baş verən növbə davalarını, həm də bəzi tərəfdarların polisə etirazını gördük.

Bəs, niyə belə hal yaşandı? Axı "Qarabağ" daha əvvəl də 30 mindən çox azarkeşin stadiona gəliş-gedişini tam təhlükəsiz və hansısa ciddi problem yaranmadan həll edə bilib. Bəlkə bu, ilk dəfə tətbiq edilən "QR Bilet" sisteminin fəsadları idi ki, təcrübəsizlik "köhlən atlar"ı pis vəziyyətdə qoydu. Axı bəzi turniketlərin işinin həddən artıq yubandığına, bu üzdən xeyli tərəfdarın boşluqlardan yararlanaraq stadiona daxil olduğuna da şahidlik etdik.

Hər halda, "Qarabağ" bütün bu məqamları araşdırmağa başlayıb. Bu barədə "Football-plus.az"a Ağdam təmsilçisinin mətbuat xidmətinin rəhbəri Anar Hacıyev məlumat verib. Onun sözlərinə görə, bir müddətdi davam edən araşdırmalar böyük ehtimalla bu gün yekunlaşacaq və nəticələri haqda ictimaiyyətə məlumat veriləcək.

KƏNAN BAHADIR