“Barselona”nın bəzi azarkeşləri növbəti etiraz aksiyası planlaşdırıblar. Onlar ötən cümə axşamı baş verən hadisəyə görə rəhbərliyi qınayırlar.

Avropa Liqasının 1/4 finalının cavab oyununda “Ayntraxt”a uduzaraq (2:3) turnirlə vidalaşan “Barselona”nın “PB Nostra Ensenya” fanat qrupu “Nou Kamp”dakı matçı qonaq komandanın 20 mindən çox azarkeşinin izləməsi ilə barışa bilmir. Bu qruplaşma La Liqada dünən keçirilən “Kadis” ilə oyundan əvvəl klub bosslarının əleyhinə aksiya təşkil etmək qərarına gəlib. Bir sıra digər qruplar isə matçı boykot etməyə üstünlük veriblər. Baş məşqçi Xavi Ernandes onları niyyətindən daşınmağa çağırıb. Yerli futbolsevərlərin ev oyununa həddən artıq rəqib həmkarlarının bilet almasına şərait yaradan rəhbərliyə ilk etirazı elə matçın gedişində reallaşmışdı. Belə ki, “Barselona”nın bəzi tərəfdarları fasilə zamanı “Nou Kamp”ı tərk edərək nəhəng arenaya bir də 55-ci dəqiqədə qayıtmışdılar. “Diario Sport”un məlumatına görə, Barselonaya “Ayntraxt”ın təxminən 30 min azarkeşi gəlib. Bileti olmayan almaniyalılar matçı kafe və barlarda izləyiblər.

“Barselona” rəhbərliyi isə öz növbəsində rəqib komandanın həddən artıq azarkeşinin stadiona necə daxil olduğunu öyrənmək üçün daxili araşdırmaya başlayıb. “Marka” qəzetinin məlumatına görə, İspaniya klubu qarşı tərəfə rəsmi olaraq 5 min bilet təqdim edib. Böyük ehtimalla qalan azarkeşlər onlara bilet almağa kömək edən turoperatorların köməyi ilə matçı stadionda izləyiblər. Bundan başqa, qonaq azarkeşlər “Nou Kamp”dakı kassalardan biletləri alıb almanlara satan ispaniyalı bilet alverçilərinin də sayəsində nəhəng arenaya daxil ola biliblər.