“Stadiona daha çox azarkeşin gələcəyinə ümidliyik” – “Qarabağ” çağırır, çağırır...
Misli premyer-liqasının 31-ci tur çərçivəsində “Qarabağ” “Neftçi”ni qəbul edəcək. Matçın biletləri çərşənbə axşamından satışdadı. Ağdam təmsilçisinin futbolçusu Kadi Borges də azarkeşləri “Bəhramov”da keçiriləcək oyuna dəvət edib.
Bəs indiyə qədər neçə bilet satılıb? Hansı sektorlara daha çox bilet satılıb? Bu sualları “Qarabağ”ın mətbuat xidmətinin rəhbəri Anar Hacıyevə ünvanladıq:
“Mərkəzi sektorlara satış təşkil olunub. Hazırda 2000-dən artıq bilet alınıb. Oyunun keçiriləcəyi günə hələ vaxt var. Stadiona daha çox azarkeşin gələcəyinə ümidliyik. Oyundan əvvəl müəyyən fəaliyyətlər də təşkil edəcəyik. İnanırıq ki, azarkeşlərimiz vacib oyunda komandamızın yanında olacaq. İnsanlar asudə vaxtını əlverişli, əyləncəli və həyəcan dolu oyunda daha yaxşı keçirəcəklər”.
Oyun aprelin 19-u, saat 20.00-da start götürəcək.
ƏSƏD SEYİDOV
