Karlo Ançelottinin tezliklə Braziliya yığmasının başına keçəcəyi rəsmən açıqlanıb. Bu haqda Braziliya Futbol Konfederasiyası məlumat yayıb.

“Real”ı tərk edəcək italiyalı mütəxəssislə birillik müqavilə imzalandığı bildirilib. Müqavilənin müddəti 2026-cı ildə keçiriləcək dünya çempionatının sonuna qədər nəzərdə tutulub. 65 yaşlı mütəxəssisin yeni komandada mayın 26-da fəaliyyət başlayacağı bildirilib.

Qeyd edək ki, Ançelotti Braziliya yığmasının tarixinə ilk əcnəbi çalışdırıcı kimi düşüb. Onun bu komandadakı fəaliyyəti DÇ-2026-nın iyunda keçiriləcək Ekvador və Paraqvay ilə növbəti seçmə oyunları ilə başlayacaq. Braziliya hələ ki gələnilki mundiala vəsiqə qazanmayıb.

Ançelotti “Real”da İspaniya çempionluğunu, iki dəfə İspaniya kubokunu və bir dəfə ölkə superkubokunu qazanıb. O, həmçinin Madrid klubu ilə üç dəfə Çempionlar Liqasının, iki dəfə UEFA Superkubokunun və klublararası dünya çempionatının qalibi olub.

Ançelottini komandanın baş məşqçi vəzifəsində mövsümün sonunda “Bayer-04”dən ayrılacağı açıqlanan Xabi Alonso əvəzləyəcək. İspaniyalı mütəxəssis Madrid klubu ilə 3 illik müddətə anlaşıb.