ÇSKA mövsümdə ilk dəfə zirvəyə yüksəldi - İCMAL
Tur “Dinamo”nun Samarada hesabına 3 xal yazması ilə start götürdü. Ardıcıl 2-ci qələbəsini qazanan Moskva təmsilçisi zəif startdan sonra yavaş-yavaş özünə gəlir.
"Football-plus.az" xəbər verir ki, “Dinamo” bu tur səfərdə qalib gələn yeganə komanda oldu. “Axmat”ın evdə “Akron”u darmadağın etməsi ilə Stanislav Çerçesov adını klubun tarixinə yazdırdı. O, “Axmat”ın başında ilk 7 çempionat oyununda uduzmayan (4 qələbə, 3 heç-heçə) birinci məşqçidi! Maraqlıdı ki, Qroznı təmsilçisi Çerçesov gələnə qədər mövsümə 3 məğlubiyyətlə başlamışdı.
“Lokomotiv”lə “Rubin”in duelində hər şeyi qonaqların qapıçısı Staverin səhvi həll etdi. Yağışlı havada keçən oyunun sonlarına yaxın Barinovun elə də qüvvətli olmayan zərbəsi zamanı qapıçı kobud səhvə yol verərək topu əlindən buraxdı və qola mane ola bilmədi. “Loko” tarixində cəmi 3-cü dəfə mövsümün ilk 10 turunu məğlubiyyətsiz tamamladı. “Dəmiyolçular” daha öncə bunu 2002 və 2005-ci illərdə bacarmışdı. “Krasnodar”da, deyəsən, yavaş-yavaş böhran başlayır. Ötən tur evdə “Zenit”ə uduzan son çempion bu dəfə cənub derbisində səfərdə “Rostov”la qolsuz bərabərə qaldı. Son 4 turda cəmi 1 qələbəsi olan Murad Musayevin komandası 6-cı turdan bəri ilk dəfə zirvədən endi.
“Zenit”in “Orenburq”u darmadağın edərək ardıcıl 2-ci qələbəsini qazandığı matça poker edən Qluşenkov damğa vurdu. O, 2018-ci ildən bəri piterlilərin heyətində çempionatda poker edən 5-ci futbolçu oldu. Qəribədi ki, XXI əsrdə digər klublarda ümumilikdə cəmi 6 poker qeydə alınıb.
Tura bazar günü yekun vuruldu. Mövsümün əvvəlinin əsas fenomeni olan “Baltika”nın, nəhayət, “kürəyini yerə vuran” tapıldı. Debütanta mövsümdəki ilk məğlubiyyəti ÇSKA yaşatdı. Ədalət naminə kalininqradlıların 83-cü dəqiqədən azlıqda qaldığını və qolu yalnız əsas vaxta artırılan 5-ci dəqiqədə buraxdığını bildirək. ÇSKA bu qələbə sayəsində mövsümdə ilk dəfə liderliyə yüksəldi! Komandanın 10-cu turdan sonra lider olması faktına sonuncu dəfə 2015/16-da rast gəlinmiş və “hərbçilər” həmin mövsümü çempion kimi tamamlamışdılar. “Nijni Novqorod”un qapısına 3 cavabsız qol vuran “Spartak” isə mövsümdə ilk böyükhesablı qələbəsini qazandı. Moskva nəhəngi ardıcıl 7-ci turda ən azı 2 qol vurmağı bacardı. Maraqlıdı ki, belə seriya klub tarixində 3-cü dəfə yaşandı və bunların ikisi Deyan Stankoviçin dönəminə təsadüf edib.
10-cu tur
Zenit – Orenburq 5:2
Qluşenkov, 22; 34; 77; 90+2. Sobolev, 74 – Senov, 83. Kamilov, 88.
Zenit: D.Adamov, Mantuan, Nino, Alip, Duqlas Santos, Vendel, Barrios (Şilov, 78), Luis Enrike (Mostovoy, 73), Qluşenkov, Pedro Enrike (Drkuşiç, 78), Kassyerra (Sobolev, 73).
Rostov – Krasnodar 0:0
Krasnodar: Aqkatsev, Petrov (Paltsev, 71), Tormena, Kosta, Olasa, Auqusto, Lenini (Krivtsov, 63), Perren (Batçi, 63), Spertsyan, Sa (Kozlov, 71), Kordoba.
ÇSKA – Baltika 1:0
Diveyev, 90+5.
ÇSKA: Akinfeyev, Qayiç (Şumanski, 87), Diveyev, Viktor, Moyzes, Kislyak, Oblyakov, Karmo (Popolitov, 73), Alves (Qlebov, 80), Kruqovoy, Musayev (Alerrandro, 73).
Spartak – Nijni Novqorod 3:0
Uqalde, 10. Fernandeş, 36; 64.
Spartak: Maksimenko, Denisov, Litvinov, Ciku, Dmitriyev (Babiç, 88), Zobnin, Fernandeş (Martins, 82), Barko (Zorin, 83), Solari, Markinyos (Bonqonda, 82), Uqalde (Qarsiya, 82).
Lokomotiv – Rubin 1:0
Barinov, 79.
Lokomotiv: Mitryuşkin, Silyanov, Poqostnov (Nyamsi, 46), Montes, Fasson (Nenaxov, 88), Barinov, Prutsev, Karpukas (Komliçenko, 72), Batrakov, Rudenko (Myalkovski, 88), Vorobyov.
Krılya Sovetov – Dinamo M 2:3
Axmetov, 59. Qaldames, 88 – Fomin, 9. Bitello, 24. Sergeyev, 34.
Axmat – Akron 3:0
Kasintura, 3. Mansilya, 72; 90.
Dinamo Mh – Soçi 0:0
1. ÇSKA 10 6 3 1 19-8 21
2. Lokomotiv 10 5 5 0 21-13 20
3. Krasnodar 10 6 2 2 20-7 20
4. Zenit 10 5 4 1 20-9 19
5. Spartak 10 5 3 2 17-14 18
6. Baltika 10 4 5 1 13-6 17
7. Dinamo M 10 4 3 3 15-12 15
8. Axmat 10 4 3 3 14-11 15
9. Rubin 10 4 3 3 13-15 15
10. Krılya Sovetov 10 3 3 4 16-19 12
11. Rostov 10 2 4 4 8-12 10
12. Dinamo Mh 10 2 4 4 5-11 10
13. Orenburq 10 1 4 5 13-21 7
14. Akron 10 1 4 5 12-17 7
15. Nijni Novqorod 10 2 0 8 8-20 6
16. Soçi 10 0 2 8 5-24 2
Bombardirlər: Batrakov (Lokomotiv), Daku (Rubin) – 8, Qluşenkov (Zenit) – 6.
Növbəti turun oyunları oktyabrın 4-5-də keçiriləcək: Soçi – Nijni Novqorod, Krasnodar – Axmat, ÇSKA – Spartak, Dinamo M – Lokomotiv, Orenburq – Rostov, Rubin – Krılya Sovetov, Baltika – Dinamo Mh, Akron – Zenit.
Oyundan sonra
Murad Musayev, “Krasnodar”ın baş məşqçisi:
“Bura 3 xal üçün gəlmişdik. Amma oyun çətin keçdi. Emosiyaların və mübarizənin önə çıxdığı qarşılaşma izlədik. Aut atışları üzündən oyun tez-tez dayanırdı. Top gah bir tərəfə, gah da o biri tərəfə keçirdi. Oyunun tempi çox aşağı idi. Futbol adına o qədər də çox şey görmədik. Ancaq qalib gələ bilmirsənsə, 1 xal da pis nəticə deyil. Deməzdim ki, böhrandayıq. İndidən belə iddia irəli sürmək tezdi. Son iki turda çətin rəqiblərlə - “Zenit” və “Rostov”la qarşılaşmışıq. Ümumiyyətlə, premyer-liqa çətin turnirdi. Burda qələbə qazanmaq asan deyil. Üstəlik heyətdə problemlər yaşayırıq. Amma bütün bunlar bizim üçün bəhanə olmamalıdı. Ona görə də yenidən qələbələr qazanmağın yolunu tapmalıyıq”.
Sergey Semak, “Zenit”in baş məşqçisi:
“Maraqlı və məhsuldar oyun izlədik. Təbii ki, 2 qol buraxmağımız xoşuma gəlmədi. Məşqçi həmişə istəyir ki, komandası qol buraxmasın. Amma sona yaxın oyun intizamımız pozuldu. Sonradan meydana çıxan futbolçular topu özlərində çox saxlamağa, bir növ paxıllıq etməyə başladılar. Boş komanda yoldaşın varsa, topu ona həmişə vaxtında ötürmək lazımdı. Qapıçımızın səhvini paltardəyişmə otağında heç müzakirə etmədik. Bu futboldu, belə səhvlərdən heç kim “sığortalanmayıb”. Amma bu günün qəhrəmanı Qluşenkovdu. Yalnız ondan danışmalıyıq. Ən xoş sözlərə layiqdi. Həm məhsuldarlıq, həm də komandaya verdiyi fayda baxımından möhtəşəm oyun sərgilədi”.
Digər xəbərlər
