Yuqoslaviya və Xorvatiya tennisçisi, məşqçisi Nikola Piliç 86 yaşında dünyasını dəyişib.

"Football-plus.az" xəbər verir ki, Piliç 1970-ci ildə keçirilən ABŞ Açıq Çempionatında cütlərin yarışının qalibi olub.

O, karyerası ərzində fərdi yarışda 4, cütlərin yarışında 6 titul qazanıb. Məşqçi kimi isə serb Novak Cokoviç, xorvat Qoran İvanişeviç, həmçinin alman Mihael Ştix ilə əməkdaşlıq edib. Piliç Cokoviçin tennisdəki atası olub, onun inkişafına, lazımi biliklərə yiyələnməsinə yardım edib, Novakın indiki səviyyəyə çatması üçün hər cür dəstək verib.

2007-ci ildə məhz Cokoviçin şəxsi xahişi ilə Piliç Serbiya yığmasının məsləhətçisi olub, bu komandanın 2010-da Devis kubokunu qazanmasına töhfə verib. Mərhum məşqçi həmçinin Almaniya və Xorvatiya yığmalarını da bu turnirdə qələbəyə daşıyıb.