Bilirsiz, bu gecə - “Qarabağ”ın qələbəsinin eşqi ilə Bakıda maşınların şütüdüyü, siqnal verdiyi, gənclərin mahnı oxuduğu, bayraq dalğalandırdığı, hər kəsin bir-birini təbrik etdiyi gecə məni nəyi xatırlatdı?! 2020-ci ilin noyabrını, 9-dan 10-na keçən gecəni. Onda işdən gəlib yatmışdım, bir də gördüm ki, evdə, həyətdə, küçədə səs-küydən qulaq tutulur, adamlar bir-birini təbrik edir, şadyanalıqdı. Ondan sonra adamın gözünə yuxu gedər?!

Bakı, Azərbaycan bu gün, əslində gecə qələbə sevinci yaşadı. Bu qələbənin memarı “Qarabağ”dı, Qurban Qurbanovdu, Azərbaycandı! Adamlarımızı belə sevinc içində, dərdən-qəmdən, kədərdən, gündəlik qayğılardan uzaq görmək necə də sevindirici idi! Avtobusdakı adamlar bayırda maşınla şütüyənlərə əl çalırdılar, onları alqışlayırdılar, mahnıların uca səslə oxunması heç kimin vecinə də deyildi. Şəhər – Bakı, Azərbaycan yatmaq istəmirdi. Görünür, sevincin yaşı yoxdu! Adam 50-60 yaşında da kiçik bir uğura sevinmək, qol açıb-oynamaq istəyir. Amma bu heç də kiçik uğur deyil. Azərbaycan çempionu Çempionlar Liqasının liqa mərhələsində ardıcıl 2-ci qələbəsini qazanıb.

2-ci hissədəki ölüb-dirilmək olmasaydı, bu geçə hər şey əla idi. Görünür, o ölüb-dirilmək də qarnir imiş, desert imiş, hər nə imiş...

Təbriklər, Qurban Qurbanov! Təbriklər, “Qarabağ”! Təbriklər, Azərbaycan!

HUŞƏNG