Qurban Qurbanovun Murad Musayevə borcu var?
10 avqust, Bakı, Tofiq Bəhramov adına Respublika stadionunun konfrans salonu. HİK üzərindəki çətin qələbədən sonra jurnalistlər önünə çıxan Qurban Qurbanov:
“Bu arada "Sabah"ı qələbə münasibətilə təbrik edirəm. İnanıram ki, cavab oyununda da yaxşı nəticə əldə edib ölkəmizin reytinq xalını artıracaqlar”.
17 avqust, Belqrad, “Partizan” stadionunun konfrans salonu. “Partizan” önündəki acı məğlubiyyətdən sonra serb jurnalistlərə danışan Murad Musayev:
"Partizan" böyük təcrübəyə malik komandadı. Onları növbəti mərhələyə keçmələri münasibəti ilə təbrik edir, qarşıdakı oyunlarda uğurlar arzulayıram".
Oxucu dərhal məndən soruşacaq, hə, nə olsun, bunun ona nə dəxli? O olsun ki... “Sabah”ın rusiyalı baş məşqçisi hər nə qədər acınacaqlı məğlubiyyətdən sonra qəhərdən boğulsa da, “Qarabağ”ın artıq ən azı Konfrans Liqasının qrupuna düşdüyünü bilirdi. Kəsə və qəti qənaətim budu ki, alicənablıq və centlmenlik göstərməli, Azərbaycanın reytinqi üçün təkbaşına çarpışmağa məcbur olan həmkarını təbrik etməliydi. Amma etmədi. Bəlkə də unutdu, bəlkə də o hayda deyildi, bəlkə də Rusiya futbolunun içindən gələn adam kimi belə nəcib jestə ehtiyac duymadı. Halbuki Musayev çempionat oyunlarında dəfələrlə Qurbanovun "Qarabağ"ını təbrik edib, onun ünvanına kompliment deyib. Hər halda, yanında adamlar, köməkçilər var, canıyanan kimsə Murad Oleqoviçə “Qarabağ”ın ardıcıl 10-cu dəfə avrokuboklarda qrup mərhələsinə vəsiqə qazandığını xatırlada bilərdi.
Kim bilir, bəlkə Musayev “Sabah”da daha güclü imperiya quracaq, “Qarabağ”ın avrokubok uğurlarını unutduracaq. Bu artıq sonranın işidi. İndi isə ortada sərt və xoşagəlməz gerçəklik var – Murad Musayev Qurban Qurbanovu təbrik etməyi özünə rəva bilmədi. Bəs Qurban Qurbanovun Murad Musayevə borcu var?..
ORXAN
Digər xəbərlər
