Tovuz şəhər stadionunda ot örtüyünün dəyişdirilməsi davam edir. Klub idman qurğusunun süni qazonunu təbii qazonla əvəz edir ki, bu da nəticələrin yaxşılaşdırılmasına hesablanan addımdı. “Turan Tovuz” məhz bu səbəbdən hələ ev oyunlarını Bakıda – “Azərsun Arena”da keçirir.

Xatırlayırsızsa, klub bir həftə əvvəl sosial şəbəkə hesabında məlumat yayaraq drenaj və suvarma sistemi quraşdırılan meydana toxum əkildiyini, prosesin oktyabrın sonuna qədər yekunlaşacağını bildirdi.

Bəs, durum hazırda nə yerdədi? Komanda Tovuzdakı ilk ev oyununu nə vaxt keçirəcək?
“Football-plus.az” bu suallarla “bozqurd”un mətbuat xidmətinin rəhbəri Süleyman Tağıyevə müraciət etdi.

Məlum oldu ki, hələ otun cücərəcəyi, lazım olan həddə çatacağı vaxt gözlənilir. Oktyabrın sonunda klub tərəfindən ot örtüyünə baxış keçiriləcək və yekun qərar veriləcək.

Maraq üçün qeyd edək ki, “Turan Tovuz” Misli premyer-liqasının 10-cu turunda oktyabrın 31-i – noyabrın 2-si aralığında “Şamaxı”nı qəbul edəcək.

KƏNAN BAHADIR