“Turan Tovuz”un mövsümlərarası fasilədə görmək istədiyi vacib işlər haqda məlumat vermişdik. Bunlar süni ot örtüyünün təbii ilə əvəzedilməsi və klubun adının “Turan” olaraq dəyişdirilməsi idi. “Bozqurd” artıq sadalanan məsələlərdən biri haqda yekun qərarı verib. Belə ki, klub ot örtüyünün dəyişdirilməsi yönündə qərarını qətiləşdirib.

“Football-plus.az”ın məlumatına görə, süni qazon bu yay təbii ot örtüyü ilə əvəzlənəcək. Bunu tovuzluların mətbuat xidmətinin rəhbəri Süleyman Tağıyev bildirib. Hazırda proseslə bağlı ilkin addımların atılması yönündə işlər görülür. Daha ətraflı məlumat tezliklə ictimaiyyətə açıqlanacaq.

Xatırladaq ki, daha əvvəl bu məsələ haqda oxucularımızı xəbərdar etmişdik. “Turan Tovuz” indi təkcə bu işin görülməsiylə yox, həm də növbəti mövsümün ilk həftələrində ev oyunlarını harda keçirəcəyi haqda suala cavab tapmalıdı. Gəncə şəhər stadionunun inşasıyla bağlı ev oyunlarını Tovuz şəhər stadionunda keçirən “Kəpəz”in də eyni aqibəti yaşadığını unutmayaq.

O başqa məsələ ki, “sarı-göylər”in ev matçlarını Qəbələ şəhər stadionunda keçirmək ehtimalı böyükdü.

KƏNAN BAHADIR