“Turan Tovuz” nə vaxt “Turan” olacaq? – klub rəsmisi açıqladı
Məlum olduğu kimi, “Turan Tovuz”un adının dəyişdirilməsi prosesinə start verilib.
Rəhbərlik ölkəmizi avrokuboklarda təmsil edən ilk klubun adını - “Turan”ı bərpa etmək niyyətindədi. Hətta bu məsələyə AFFA İcraiyyə Komitəsinin ötən il dekabrın 17-də keçirilən iclasında baxılıb və müsbət yanaşılıb. Klub artıq bu məqsədlə lazımi sənədləri federasiyaya təqdim edib.
Bəs, proses nə vaxt yekunlaşacaq? Mövzuyla bağlı hansısa yenilik varmı?
“Football-plus.az” bu suallarla “Turan Tovuz”un İdarə Heyətinin sədr müavini, infrastruktur və maliyyə üzrə direktoru Əli Balakişiyevə müraciət etdi. Klub rəsmisinin cavabı:
“Klubun adının dəyişdirilməsi uzun vaxt tələb edən prosesdi. Bu üzdən məsələ yeni mövsümün startına qədər yekunlaşmayacaq”.
Maraqlıdı ki, artıq “Turan Tovuz” akademiyasının üzərinə “Turan Futbol Klubu” sözləri yazılıb. Bunu özündə əks etdirən şəkil bəzi media qurumlarında və sosial şəbəkələrdə yayılıb.
Xatırladaq ki, 2014-cü il oktyabrın 10-na qədər klubun adı “Turan” olub.
KƏNAN BAHADIR
Digər xəbərlər
