UEFA Rusiyadan sonra İsrail futboluna da sanksiya tətbiq edə bilər. Bu gün İsrail komandalarının beynəlxalq turnirlərdən kənarlaşdırılması ilə bağlı qərarın verilməsi gözlənilir.

Bu barədə İsrail mətbuatı məlumat yayıb. Qərarın sentyabrın 23-də qəbul edilə biləcəyini yazan “Israel Hayom” qəzetinin məlumatına görə, İsrail tərəfi son günlər bu məsələnin UEFA-nın İcraiyyə Komitəsinin (İK) iclasında ümumi səsverməyə çıxarılmasının qarşısını almağa çalışıb.

İsraildə hesab olunur ki, Avropa ölkələrinin çoxu bu gün İsrailin uzaqlaşdırılmasını dəstəkləməyə hazırdı. “Israel Hayom”un iddiasına əsasən, Qətər maraqlı tərəflərə ciddi təzyiq göstərir və İsrail komandalarının turnirlərdən kənarlaşdırılması məsələsinin UEFA İK-nın iclasında müzakirəyə çıxarılması üçün son bir həftə ərzində fəal lobbiçilik təbliğatı aparıb. Buna isə İsrailin Qətərin paytaxtı Dohaya hərbi hücumu rəvac verib.

Məlumata əsasən, İK-nın səs vermək hüququ olan 20 üzvünün böyük əksəriyyəti israillilərə sanksiya verilməsinin tərəfdarıdı. Məlum təşəbbüsü yalnız iki-üç ölkənin dəstəkləmədiyi də qeyd edilir.

Ehtimal olunan qərar verilərsə, İsrail yığması DÇ-2026-nın seçmə mərhələsindən kənarlaşdırılacaq, Təl-Əviv “Makkabi”si isə Avropa Liqasında iştirak edə bilməyəcək.

Xatırladaq ki, İsrailin digər klublarından Beer Şeva “Hapoel”i Avropa Liqasının, Hayfa “Makkabi”si ilə “Beytar” isə Konfran Liqasının təsnifat mərhələsində mübarizəni dayandırıblar. İsrail yığmasının DÇ-2026-nın seçmə turnirində I qrupunda keçirdiyi 5 oyunda 9 xal qazandığını, Norveç və İtaliyadan sonra 3-cü yeri tutduğunu da xatırladaq.

Sanksiyalar Rusiyanın beynəlxal futbol yarışlarından uzaqlaşdırılmasına bənzər formada tətbiq oluna bilər.

Xatırladaq ki, Rusiyanın bütün yığmaları və klubları şimal qonşumuzun Ukraynaya hərbi təcavüzündən bir neçə gün sonra - 2022-ci il fevralın 28-dən UEFA-nın və FİFA-nın bayrağı altında təşkil edilən turnirlərdən qeyri-müəyyən müddətə kənarlaşdırılıblar.