UEFA İsrail yığması ilə bağlı növbəti qərarı verib.

Bu komandanın Millətlər Liqası çərçivəsində keçirəcəyi ev oyunlarınn məkanına qismən aydınlıq gətirilib.

İsrail yığması Millətlər Liqasının A liqasının 2-ci qrupunda Fransa, İtaliya və Belçika ilə yarışacaq. Beynəlxalq matçlara qoyulan qadağa yalnız İsrailin Qəzza zolağındakı müharibənin sona çatması və ölkənin şimalında, Livanla sərhəddə hərbi əməliyyatların tamamilə dayandırılması ilə aradan qaldırıla bilər. Buna görə UEFA İsrail yığmasının ev oyunlarını neytral meydanda keçirməsi ilə bağlı qərarını qüvvədə saxlayıb.

Onu da qeyd edək ki, Belçika Kral Futbol İttifaqı iğtişaş qorxusu və terror təhlükəsi səbəbindən sentyabrın 6-da Brüsseldə keçiriləcək İsrail ilə ilk ev oyununa biletlərin satışını dayandırmaq qərarına gəlib. UEFA-nın şərti yerinə yetirilməsə, İsrail klubları da avrokuboklarda ev oyunlarını neytral meydanlarda keçirməli olacaqlar. Xatırladaq ki, Asiya ölkəsinin milli və klub komandaları 2023/24 mövsümündə ötən ilin oktyabrından rəqiblərini Macarıstanda və Serbiyada qəbul etmişdilər.