Bu qrupun əsas oyunu Zenitsada keçirildi.

"Football-plus.az" xəbər verir ki, bu tura qədər xal itirməyən iki komandanın - Bosniya və Hersoqovina ilə Avstriyanın dueli, gözlənildiyi kimi, maraqlı keçdi.

Matçın ən yaddaqalan anlarından biri avstriyalıların çalışdırıcısı Ralf Ranqnikin meydanın ortasında velosiped sürməsi (!) oldu. Məsələ burasındadı ki, təcrübəli mütəxəssis bu yaxınlarda ayağından əməliyyat olunub və həkimlər ona hələ ki mümkün qədər az gəzməyi məsləhət görüb.

Ranqnik ilk yarı bitən kimi meydanın bir başından o biri başına ayaqla yollanmamaq üçün bu cür kreativ və qeyri-adi üsuldan istifadə etmək qərarına gəldi. Görüşdə əsas hadisələr 2-ci hissəyə təsadüf etdi. Əvvəlcə Zabitser əla zərbə ilə baxımlı qol vursa da, meydan sahibləri, demək olar, cavab hücumundaca hesabı bərabərləşdirdilər. Ceko cinah ötürməsini dəqiq tamamladı. Ancaq son sözü Avstriya söylədi. Qonaqlar Laymerin qolu sayəsində çox mühüm qələbə qazanaraq itkisiz irəliləməkdə davam etdilər.

Bosniyanın 2-ci pilləni tutub pley-offda oynamaq şansları pis deyil. Çünki Rumıniya bu seçmə mərhələni qeyri-sabit keçirməkdə və xalları sağa-sola paylamaqdadı. Mirça Luçeskunun komandası bu tur Nikosiyaya səfər etmişdi. Rumınlar ilk 18 dəqiqəyə ikitopluq üstünlük yaxaladıqları qarşılaşmada qələbəni əldən verməyə özlərində güc tapdılar. Hələ fasiləyə qədər qollardan birinin əvəzini çıxan Cənubi Kipr 2-ci hissənin ortalarında bərabərlik qolunu da vurdu.

Hazırda Bosniya Rumıniyadan 5 xal öndədi. Amma təqvim rumıniyalılar üçün heç də pis deyil. Çünki Bosniya artıq San Marinoya qarşı hər iki oyununu keçirib. Üstəlik bu komandanı sonuncu turda çətin Avstriya səfəri gözləyəcək. 

H qrupu
6-cı tur
Bosniya və Hersoqovina - Avstriya 1:2 (0:0)
Bosniya və Hersoqovina: Vasil, Dediç (Qazibeqoviç, 58), Katiç, Muharemoviç, Muyakiç (Bazdar, 87), Sunyiç, Tahiroviç (Alaybeqoviç, 72), Qiqoviç (Bayraktareviç, 72), Memiç (Başiç, 72), Demiroviç, Ceko.
Avstriya: A.Şlager, Laymer, Linhart, Alaba (Danso, 78), Mvene, Zayvald, Şmid (Vimmer, 62), K.Şlager (Qrillitş, 62), Baumqartner (Prass, 90), Zabitser, Qreqoritş (Arnautoviç, 62).
Qollar: Zabitser, 49 (0:1). Ceko, 50 (1:1). Laymer, 65 (1:2).
Vərəqələr: Muyakiç, 45+1. Zabitser, 70. Katiç, 86. Vimmer, 87. Mvene, 89. Qreqoritş, 90+6 - sarı. Vimmer, 90+5 - qırmızı (ikinci sarı). 
Hakim: Xesus Xil (İspaniya). 
9 sentyabr. Zenitsa. 11700 tamaşaçı. 

Cənubi Kipr - Rumıniya 2:2 (1:2)
Cənubi Kipr: Fabiano, Şikkis, Sielis, Laifis, Pileas (Korreya, 46), Kastanos, Kusulos (Xaralampus, 62), Loizu (Kakullis, 62), Kosti (Kiriaku, 68), Sionis (Kutsakos, 87), Pittas. 
Rumıniya: Moldovan, Ratsiu, Gita, Burke, Banku, Stançiu, M.Marin, R.Marin (Şut, 80), Man (Soresku, 80), Dobre (Miçulesku, 65), Draquş. 
Qollar: Draquş, 2 (0:1). Draquş, 18 (0:2). Loizu, 29 (1:2). Xaralampus, 76 (2:2).
Vərəqələr: Banku, 21. Burke, 44. Kusulos, 48. Pittas, 54. Xaralampus, 90+1 - sarı. 
Hakim: Matey Yuq (Sloveniya). 
9 sentyabr. Nikosiya. 4875 tamaşaçı. 

1. Bosniya və H. 5 4 0 1 11-3 12
2. Avstriya 4 4 0 0 9-2 12
3. Rumıniya 5 2 1 2 10-6 7
4. C.Kipr 5 1 1 3 5-7 4
5. San Marino 5 0 0 5 1-18 0

9 oktyabr: Cənubi Kipr - Bosniya və Hersoqovina, Avstriya - San Marino.