Çempionat sona yaxınlaşdıqca avrokuboklara vəsiqə uğrunda mübarizənin gərginləşməsi təbiidi.

Artıq heç bir iddiası qalmayan “Səbail” gümüş medallara iddiaçı “Neftçi”ni qəbul etdi. Oyuna maraq o qədər böyük olmasa da, hər hald, tribunaların üçdəbiri dolmuşdu. Həm “Dənizçilər”, həm də “Forza Neftçi” öz sektorlarında yerlərini almışdılar.

Oyun qarşılıqlı hücumlarla başladı. İlk təhlükəli vəziyyət “Neftçi”dən gəldi. Künc zərbəsindən sonra Lebon meydan sahiblərinə həyəcanlı anlar yaşatdı. Lakin onun zərbəsi qeyri-dəqiq alındı. Çox keçmədən “ağ-qaralar” növbəti dəfə qola yaxın oldu. Bu dəfə Morenonun zərbəsi düz qolkiperin üzərinə getdi. Ardından Ozobiç də qapını nişan aldı. Amma o da dəqiq ola bilmədi. “Səbail”in buna cavabı isə özünü çox gözlətmədi. Queta fərdi reydini zərbə ilə tamamlasa da, Brkiç inamlı oynadı. 34-cü dəqiqədə Boqomolski hesabı açmağa yaxın oldu. Lakin Quliyev topu dəf etməyi bacardı. İlk hissənin sonlarında “dənizçilər” fəallığı artırdı. 41-ci dəqiqədə Quetanın qüvvətli zərbəsini qapıçı küncə çıxarı. Ardından Samir Abdullayevin zərbəsində top toru yandan silkələdi. Hücumlarını davam etdirən “Səbail” daha bir epizodda Nuno ilə hesabı açmağa yaxın oldu. Lakin onun da zərbəsi qeyri-dəqiq alındı.

İkinci yarı daha sürətli başladı. Dərhal irəli atılan meydan sahibləri Nuno ilə təhlükəli oldu. Onun zərbəsini Brkiç çətinliklə də olsa, küncə çıxardı. Çox keçmədən Pedro yenidən səhnəyə çıxdı. Bu dəfə müdafiəçilər ona mane olmağı bacardı. Ardından yarımmüdafiəçi Nağıyevin cinah asmasını zərbə ilə tamamladı. Lakin yenə dəqiq ola bilmədi. Əvəzində isə “Neftçi” oyunu bərabərləşdirməyi bacardı. Caberin ötürməsindən sonra Tamaşın baş zərbəsi təhlükəli alındı, amma dəqiq olmadı. Buna baxmayaraq, “ağ-qaralar” 69-cu dəqiqədə istəyinə çatdı. Boqomolskinin cinah asmasını Moreno akrobatik zərbə ilə qapıya göndərdi – 1:0. “Səbail” qolun şokundan ayılmadan qapısında daha bir top gördü. Lebonun ötürməsini Caber tamamladı – 2:0. 82-ci dəqiqədə isə “Neftçi” 3-cü qolu da vurmağı bacardı. Ozobiçin ötürməsini Qarayev dəqiq zərbə ilə tamamladı. Bundan sonra meydan sahibləri irəli atılsa da, hesabı dəyişmək mümkün olmadı. Bununla da, “Neftçi” yenidən 2-ci pilləyə yüksəldi. “Səbail” üçün isə cari mövsümü artıq bitmiş saymaq olar.

Gözdən qaçmadı
* Matçı izləyənlər arasında yığmanın seleksiyaçısı İlqar Qurbanov da var idi.
* 65-ci dəqiqədə əvəzetmə zamanı tabloda Ramalinqomun nömrəsi olan “9”un əvəzinə “90” rəqəmi göstərildi.
* Bojoviç epizodların birində Ağadadaş Salyanskiyə qəzəbini “sən axmaqsan?” deməklə göstərdi.

İSMAYIL XEYRULLAYEV