“Ukrayna qrupun favoritlərindi. Komanda bu cür sınağa tam hazır olmalıdı. Bəlkə də məlum məğlubiyyətə görə bəzi futbolçularda psixoloji problemlər ola bilər. Ancaq oyun “doğma divarlar” arasında keçiriləcək. Ayxan müəllim də yığmadadı. İnanıram ki, kollektivi bu durumdan çıxara biləcək. Bəs, necə oynamalıyıq? Məncə, bu suala cavab verməyim doğru olmaz. Hər halda, məşqçilər korpusu nəyi necə edəcəyini bilir. O başqa məsələ ki, çatışmazlıqlar var. Yığmaya dəvət edilən futbolçuların çoxu öz klubunda şans qazanmır. Formada deyillər. Həmçinin İslandiyaya qarşı oyunda 90 dəqiqə çıxış edən futbolçular yorğun ola bilər. Böyük ehtimalla, heyətdə rotasiyalar olacaq. Məhz oyun tərzinə gəlincə, Santuşun sisteminin dəyişdiriləcəyini düşünmürəm. Yəqin ki, komandamız meydana beşli müdafiə xəttiylə çıxacaq. Ancaq bu o demək deyil ki, oyun ərzində yalnız müdafiə olunmalıyıq. İslandiyayla matçdakı kimi arxa xəttə sığınmamalıyıq. Arabir hücumlar edib Ukraynanı təzyiq altında saxlamalıyıq. Əlbəttə, yığcam oynamaq şərtiylə”.