Bayram günlərində belə mövzuya toxunmaqla bəlkə də kimlərinsə ovqatını korlayacağıq. Ancaq jurnalist gördüyü nöqsandan yazmırsa, onu ictimailəşdirmirsə, deməli...
“Sumqayıt”ın “feysbuk” səhifəsinə nəzər salarkən qapaq fotosu diqqətimizi çəkdi. Adi kollektiv şəkildi, zahirən burda qəribə heç nə yoxdu. Amma yox, qəribə məqam da var. Ön cərgədə oturan 16 nəfər arasında – mərkəzdə komandanın sabiq baş məşqçisi Ayxan Abbasov da yer alıb. Əlbəttə, “Sumqayıt” camiəsinin son nəticələrə görə Ayxan bəyin xiffətini çəkməsi təbiidi. Ancaq xiffəti, həsrəti ifadə etməyin başqa yollarını tapmaq lazımdı. Artıq 3 aydı ki, “Sumqayıt”ın “sükanı arxasına” postsovet məkanının tanınan məşqçilərindən Aleksey Baqa keçib. Lap tutaq ki, Belarus bu gün şərin – Ukraynanı işğal etməyə çalışan Rusiyanın yanındadı. Məgər bu Riad Rəfiyevə və komandasına belaruslu Baqaya münasibətdə bunca qeyri-peşəkarlıq göstərməyə əsas verirmi? İşdi-şayət Aleksey Anatolyeviç “Sumqayıt”ın “feysbuk” səhifəsinə baxsa və orda öz yerində Ayxan bəyin şəklini görsə, klub idarəçiləri ona hansı cavabı verəcək? Bizdən deməsi, arkadaş! Səhvinizi düzəldin ki, biabır olmayasız...
ORXAN