"Qələbə coşqusu yaşayan azərbaycanlı idman jurnalistləri hisslərini cilovlaya bilmədi və mətbuat konfransına qatılan Robbi Kinə alçaldıcı suallar ünvanladı. Onlar "Ferentsvaroş"un baş məşqçisinə yuxarıdan aşağı baxmaqdan çəkinmədilər. Hər halda, Kin də sərt cavablar verməkdən çəkinmədi. Necə deyərlər, onları həqiqətlərlə susdurdu. Bəli, "yaşıl qartallar" Bakıda qələbə qazandı. Ancaq hesab əsas mərhələyə yüksəlməyimiz üçün kifayət etmədi. Bu üzdən Kin azərbaycanlıların qarşısına məğlub komandanın çalışdırıcısı kimi çıxdı. Onun məqsədi fərqli idi. Nankorluq etmədi və susmaq haqqı olduğu halda hər sualı cavablamaq üçün səy göstərdi. Lakin azərbaycanlılar onu lazım olduğu kimi anlamadı, daha dəqiqi, anlamaq istəmədi. Görünür, bəziləri Azərbaycanda Kin və "Ferentsvaroş" haqda doğru olmayan məlumatlar yayıb və hamını buna inandırıb. Məncə, onlar reallıqdan uzaq idilər. Jurnalistlər baş məşqçimizin komandanın vurduğu üç qola görə həddən artıq çox sevindiyini dedi və layiq olduqları cavabı aldı: "Sən dəli olmusan? Qol vurmuşuqsa, hərəkətsiz qalmalıyıq? Biz robot deyilik! Belə ola bilmərik. Çünki azarkeşlər hisslərə və mübarizə arzusuna çox önəm verir. İstər meydanda, istərsə də meydandan kənarda bunları görmək istəyir. "Qarabağ"ın futbolçuları bizim texniki zonanın ətrafında sevinc qışqırıqlarıyla qaçanda bizdən daha xoşbəxt, çılğın görünürdülər".
Azərbaycanlı jurnalistlər Robbi Kini həm də kinli və özündənrazı olmaqla günahlandırdı. Niyə? Deyəsən, onu yanlış anlayıblar. Kin bu məsələyə aydınlıq gətirdi. Dedi ki, qələbə qazanacaqlarına inandıqlarını bildirib. Yəni ortada konkret iddia yoxdu. Hər halda, onlar "Ferentsvaroş"u kiçiltməyə çalışdılar. Kadinin "Qarabağ"ı seçdiyini qabartdılar. Və Kindən daha bir layiqli cavab aldılar. Həqiqətən də "Qarabağ"ın Çempionlar Liqasında nə edəcəyi heç kim üçün maraqlı deyil!"