“Qarabağ”ın Çempionlar Liqasının pley-offundakı rəqibi “Ferentsvaroş” Bakıdakı oyunöncəsi məşqi ləğv edib.

Səbəb aydındı – Robbi Kin taktiki planlarını gizlədir, həmçinin kiminsə “Qarabağ” üçün casusluq edəcəyindən çəkinir. Bunu belə başa düşmək olarmı? Təcrübəli mütəxəssis Vaqif Sadıqovla bu haqda söhbət etdik.

- Vaqif bəy, məşqin ləğv edilməsini necə qarşılayaq?
- Hər məşqçinin yanaşması fərqlidi. Robbi Kin Budapeştdə “Qarabağ”ın gücünü gördü. Məşqi ləğv etməklə “Qarabağ”a mesaj verdi ki, oyuna ciddi hazırlaşırıq. Bu da normal haldı.

- Necə deyərlər, şər deməsən, xeyir gəlməz. “Qarabağ” erkən qol buraxsa, Elvin və ya bir başqa futbolçumuz qırmızı vərəqə alsa, “Qarabağ” üstünlüyü əldən verməz ki?
- Həmişə demişəm ki, “Qarabağ” ekstremal vəziyyətə düşəndə dərhal çıxış yolunu tapır. Allah uzaq eləsin, “Qarabağ” belə vəziyyətə düşsə, inanmıram ki, üstünlüyü əldən verə. Bunun səbəbi də komandanın təcrübəsidi. “Qarabağ” təcrübəli komandadı. Qurban Qurbanovun bir yox, bir neçə planı var.

- Sabahkı oyunla bağlı düşüncələriniz necədi?
- “Qarabağ”a inanıram və güvənirəm. İnşallah, çempionumuz Çempionlar Liqasının əsas mərhələsinə yüksələcək.

MÜZƏFFƏR QULUZADƏ