İstanbul nəhəngləri - ''Qalatasaray'' ilə ''Beşiktaş'' heyətini yeni futbolçu ilə gücləndirib.

''Cim-Bom'' uzun müddətdi danışıqlar apardığı ''Monako''lu Uilfrid Sinqonu İstanbula gətirib. Tibbi müayinənin ardından kot d'İvuarlı futbolçu ilə ''4+1'' illik müqavilə imzalanacaq. Keçidin maddi detallarına gəlincə, ''sarı-qırmızılar'' 30 milyon avro ödəyəcəklər.

Müqavilədə şərtə bağlı maksimum 5 milyon avroluq bonus, eləcə də sonrakı satışdan 10 faiz pay maddəsi də yer alacaq. 24 yaşlı Sinqo mərkəz müdafiəçisidi. ''Torino''nun yetirməsi olan və peşəkar karyerasına bu klubda başlayan istedadlı futbolçu 2023-cü ildən ''Monako''nun şərəfini qoruyurdu. Moneqasklılar iki il öncə bu transferə görə 9,1 milyon avro ödəmişdilər. Sinqo Fransa karyerasında 60 rəsmi oyuna çıxaraq 4 qol, 4 məhsuldar ötürmə ilə fərqlənib. O, İstanbul hava limanında verdiyi açıqlamada daha öncə ''Qalatasaray''da oynamış həmyerliləri Didye Droqba və Emmanuel Ebuedən məsləhət aldığını etiraf edib.

Elə ''Beşiktaş'' da mərkəz müdafiəçisi transfer edib. Söhbət ''Yuventus''lu Tyaqo Calodan gedir ''Ağ-qaralar'' portuqaliyalı futbolçu ilə üçillik müqavilə imzalayıblar. ''Sportinq''in yetirməsi olan və qısa müddət ''Milan''da da top qovan Calonun karyerası onun 2019-cu ildə ''Lill''ə yollanmasından sonra normal axara düşdü. Burda Burak Yılmaz ilə birlikdə 2020/21-də ölkə çempionluğunu qazanan Calo 2024-ün yanvarından ''Yuventus''a məxsus idi. Amma o, 2024/25-i icarə əsasında ''Portu''da keçirmiş və 17 oyuna çıxaraq aktivinə 2 qol vurmuşdu. Bu transfer ''Beşiktaş''a 3,5 milyon avroya başa gələcək.

İki klub arasındakı anlaşmaya əsasən bu məbləğ ''Yuventus''a 3 il ərzində ödəniləcək. Müqavilədə 1 milyon avroluq bonus da mövcuddu. Onu da bildirək ki, Calo ''Beşiktaş''ın son 6 gündə Rıdvan Yılmaz və Əl Bilal Turedən sonra 3-cü, ümumilikdə isə bu yay heyətinə qatdığı 8-ci futbolçudu.