Son günlərə qədər əsasən “Fənərbaxça” ilə “Qalatasaray” belə desək, bir-birinin burnunun ucundan oyunçuları oğurlayaraq acıq verirdisə, indi də bu mübarizəyə “Beşiktaş” qoşuldu.

"Football-plus.az" xəbər verir ki, İstanbul nəhəngi heyətini Milot Raşitsa ilə gücləndirib!

Bilindiyi kimi, müqavilə ilə “Norviç”ə məxsus olan kosovolu vinger ötən mövsümü icarə əsasında “Qalatasaray”da keçirmişdi. 30 rəsmi oyuna çıxaraq 6 qol, 7 məhsuldar ötürməlik performans sərgiləyən və çempionluqda müəyyən rol oynayan 27 yaşlı futbolçu icarə müddəti başa çatandan sonra İngiltərəyə qayıtmışdı. Bütün yayboyu “sarı-qırmızılar” “Norviç” ilə danışıqlar aparırdılar. “Norviç”in tələb etdiyi pulu aşağı salmağa çalışaraq danışıqlar prosesində fəallıq göstərməyən “Qalatasaray” sonda Əli aşından da oldu, Vəli aşından da. Raşitsa nəinki əldən çıxdı, həm də əzəli rəqiblərdən birinə qismət oldu! Araya girərək “Norviç”in tələb etdiyi 5 milyon avronu ödəməyə razı olan “Qartal” qısa müddət ərzində bu transferi tamamladı. Raşitsa srağagün axşam saatlarında xüsusi təyyarə ilə İstanbula gəldi. Deyilənə görə, “Qalatasaray” rəsmiləri hətta təyyarədə də son ana qədər Raşitsaya zəng vuraraq “İstanbula gələndən sonra bizimlə görüşmədən heç kimlə müqavilə imzalama” deyibmişlər. “Beşiktaş”lı fanatlar tərəfindən qarşılanan futbolçu hava limanında “Beşiktaş”da olduğum üçün çox sevincli və həyəcanlıyam” açıqlamasını verdi. Tibbi müayinədən keçəndən sonra bu futbolçu ilə dördillik müqavilə imzalanacaq. Onun maaşı isə 2 milyon avro civarında olacaq. Bununla da “Beşiktaş” “Qalatasaray”dan Xəlil Dərvişoğlunun qisasını almış oldu.

Bu arada bu iki nəhəng daha bir futbolçunun transferində bir-birinə rəqib olub. Söhbət dünyaca ünlü ispaniyalı müdafiəçi Serxio Ramosdan gedir. PSJ-dən ayrılan və azad agent statusuna malik 37 yaşlı futbolçu ən son “Qalatasaray”ın paylaşımlarından birini bəyənməklə diqqəti çəkib. Amma Ramosun tələbləri çox ağırdı. Karyerasının son böyük müqaviləsi olacağını düşünən dünya və Avropa çempionu ona maraq göstərən klublardan 2,5 milyon avro imza parası, 5 milyon avroluq məvacib və “2+1” illik müqavilə tələb edir. Daha öncə “Qalatasaray”ın Ramosa birillik müqavilə təklif etdiyi bildirilmişdi. Son günlərdə Ramosa maraq göstərməyə başlayan “Beşiktaş”ın təklifi barədə isə məlumat yoxdu.