Çempionlar Liqasının pley-offunda cavab oyunları keçirilir. Dünən ''Kayrat'' sensasiyon uğuru ilə bütün türk dünyasını sevindirdi. Bu gün isə sıra ''Qarabağ'' və ''Fənərbaxça''dadı. Təmsilçimizdən fərqli olaraq İstanbul nəhənginin işi çox çətin görünür. Çünki evdəki ilk oyundan qolsuz bərabərliklə ayrılan ''Fənər'' bu dəfə ''Benfika''nı səfərdə yenmək məcburiyyətindədi. Bu qarşılaşmadan öncə çox maraqlı fikirlər səslənib. Məsələn, ''Fənər''in vitse-prezidenti Hamdi Akın istanbulluların lissabonluları məğlub edəcək gücdə olduğunu vurğulayaraq bunları deyib: ''Bu oyunda hər şey mümkündü. Mərhələni adlaya bilərik. Özü də çox rahat şəkildə. Niyə də olmasın? ''Benfika''da qeyri-adi nə var? İlk oyunda onların oyununu hamımız gördük. Çox da önəmli komanda deyil. Bərabər səviyyəli bir oyun olacağını düşünürəm''. Oyunöncəsi mətbuat konfransında ''Fənər''in çalışdırıcısı Joze Mourinyoya klub rəsmisinin bu sözləri barədə sual ünvanlandı. Mourinyo tək özünü yox, həm də ''Fənərbaxça''nı biabır edərək bir ildən çoxdu işlədiyi klubun vitse-prezidentini tanımadığını bildirdi: ''Bu matçın asan və ya çətin keçəcəyinə dair açıqlamalar verən şəxsi tanımıram. Bu sözlər komandamızın oyununa təsir etməyəcək. Bəlkə də bu açıqlamaları klub daxilində və ya rəhbərlikdə ona nüfuzunu gücləndirmək üçün yardım edəcək. Amma mən bu insanın heç adını belə eşitməmişəm''. Portuqaliyalı mütəxəssis tək bu biabırçılıqla kifayətlənmədi. O, transfer mövzusunda da ''Fənər'' rəhbərliyini yerin dibinə soxmaqdan çəkinmədi: ''Kərəm Aktürkoğlunun transferi barədə düşünmürəm. Rəhbərliyin ''Benfika''ya qarşı hər iki oyunda mənim imkanlarımı genişləndirmək üçün xüsusi nəsə etdiyini düşünmürəm. ÇL-ə qatılmaq bu klub üçün həyati əhəmiyyət kəsb etsəydi, ''Feyenoord'' səddi keçildikdən sonra ''Benfika'' ilə oyuna qədər olan müddətdə transferdə yeni bir şeylər olardı. ''Feyenoord'' ilə matçda güvəndiyim futbolçular bu dəfə də meydanda olacaq. ÇL-in əsas mərhələsinə qatılmaq ''Fənərbaxça'' üçün həm nüfuz, həm də maddi baxımdan önəmlidi. Amma ÇL-ə qatılsaq, hədəflərimiz müəyyən çərçivə daxilində olacaq. AL-ə qatıldıqda isə hədəflərimiz böyüyəcək. ''Benfika'' ilə eyni heyətə malik deyilik. Bir məşqçinin rəqibə sürpriz etməsi üçün lazım olan imkanlar mənim əlimdə yoxdu. Seçim imkanımız sürpriz edəcək qədər geniş deyil. Daha öncə ''Da Luj''da heç vaxt uduzmamışam. Çünki bura güclü klublarla - ''Portu'' və ''Mançester Yunayted'' ilə gəlmişdim''.