“İmişli” - “Neftçi” oyununda qalib müəyyənləşmədi (0:0).

Oyunsonrası mətbuat konfransında “ağ-qaralar”ın baş məşqçisi Samir Abasov jurnalistlərin suallarını cavabladı.

- Azarkeşlərə təşəkkür edirəm ki, o boyda yol gəliblər. Onlar da oyunun içindəydilər. Təəssüf ki, azarkeşləri sevindirə bilmədik. İki oyundu qələbə qazana bilmirik. İlk oyundan sonra İdarə Heyəti yanımızda oldu. Əsas nəticədi. Gələcəkdə daha yaxşı, bir-birini anlayan, başa düşən komanda görəcəyik.

- Əsas narazı qaldığınız məqam nə oldu?
- Birinci hissədən narazı qaldım. Fasilədə paltardəyişmə otağında futbolçularla danışdıq, temp verdik. Hər iki oyunda qol imkanlarımız oldu. Sürətli futbolçularımız geniş məsafədə daha da önə çıxmalıdı. Bu, bir az zaman alacaq. Ümumi oyunda dinamika yox idi. İkinci hissədə daha istəkliydik. İkinci hissədə də top itkiləri olsa da, bu, tələskənlikdən irəli gəlirdi. Futbolçularıma minnətdaram.

- Emin Mahmudov niyə əvəz olundu?
- Özü istədi. Səhhətində problem var idi.

- “Neftçi”dən nə vaxt qələbə gözləyək? Komanda nə vaxt formalaşacaq?
- Formalaşmamaq söhbəti deyil. Formalaşmışıq. Komanda normal vəziyyətdədi. Futbolçular arasında anlaşmazlıq var. Məşqlərdə də bu sezilir. Buna vaxt lazımdı ki, bir-birini başa düşsünlər. Qaçmaları, mübarizələri yerindədi. İstək yüksək səviyyədədi. Bu reallıq var komandada.

- Komanda yeni formalaşıb. Əksəriyyət “Neftçi”nin rahat xal qazanacağını gözləyirdi. Amma belə oımadı. Belə komandalara qarşı oynamaq çətindi. Siz də belə düşünürsüz?
- Təəssüf ki, sənin kimi düşünən azdı. Müdafiəni qurmaq asandı. Komandanı müdafiədən oynatmaq asandı. Bizim işimiz, “Neftçi”nin tələbi nədi? Əsas məsələ budu. Yeni qurulmuş komandayıq. Uşaqlarla danışanda bu oyunu udmaqdan, mübarizə aparmaqdan danışırdıq. Ötən mövsüm rəqibin hər hücumunda qol olacağından qorxurduq. İndi istəyimiz başqadı. Qapalı komandaya qol vurmaq çətindi.

- Transfer məsələsi yekunlaşıb?
- Xeyr. Yekunlaşmayacaq da. İndiki məqamda əlimizdə olan futbolçuları ən yüksək performansına çıxarmaq lazımdı.

- “İmişli” ilə səfər oyunu çətindi, yoxsa “Turan Tovuz”la ev oyunu?
- Süni örtükdə oynamaq çox çətindi. “Qarabağ” da bundan şikayətlənirdi. Süni ot örtüyündə oynamaq top saxlayan komandalar üçün çətindi.

– Əvəzedici komandaya göndərilən futbolçuların taleyi necə olacaq?
- Futbolçularla danışmışıq. Hər şeyi demişik, seçimi onların öhdəsinə buraxmışıq. Futbolçular da dərk etməlidi, düşünməlidi.

MÜZƏFFƏR QULUZADƏ