“Neftçi” Misli premyer-liqasının 20-ci turunda “Araz-Naxçıvan”a məğlub oldu - 2:1.

“Football-plus.az” bakılıların baş məşqçisi Samir Abasovun oyunsonrası mətbuat konfransından hesabatı təqdim edir.

- Birinci hissədə nə baş verdi ki, fasilədən sonra dörd dəyişiklik etdiz?
- Bəli, tam narazı qaldım. Hücum etməkdə problemlərimiz var. Bu problem üzə çıxdı. Fikirləşdik ki, daha kreativ oynayaq. Futbolçular verilən tapşırıqları yerinə yetirə bilmədilər. İkinci hissədə bu vəziyyəti dəyişməyə çalışdıq. Düşünürəm ki, alındı. Qol epizodlarımız oldu, amma yararlana bilmədik. Standart vəziyyətdən qapımızda qol gördük. Ümidimiz 2-ci hissəyə idi. İmkanım olsaydı, beşincini də dərhal dəyişərdim. Problemlərimiz var. Hələ ki bu çətinliklərin öhdəsindən gələ bilmirik. Ümid edirəm ki, vaxtımız var. Danışdığımız oyunçuları gətirə bilərik. Bəlkə onlarla nələrisə düzəldərik. Bizim üçün önəmli oyunlar var. Artıq bütün üstünlüyü kuboka verəcəyik. Rəqibi də təbrik edirəm.

- Yeddi yerli futbolçu ilə oyuna çıxdız. Legionerlərə üsyan edirsiz? Onları yayda vaqonla geri qaytaracaqsız?
- Vaqonla, təyyarə ilə geri qaytarılacaq - yayda baxacağıq. Üsyan deyildi. Yayda buna baxacağıq. Bu gün üsyandan söhbət getmir. Əlimizdə olan heyəti məşqlərə görə dəyərləndirdik. Bəzən də futbolçunun genetik bacarığına uyğun qururuq. Mövsümün ortasında gəlmişəm. Əlimizdə olanlarla oynamalıyıq. Gələn dəfə meydanda 11 yerli olacaqsa, bunu normal qarşılamağınızı istəyərdim.

- Üç mərkəz yarımmüdafiəçisinin heç biri 10 nömrə deyil. 10 nömrəniz yox idi?
- 10 nömrə funksiyası Ozobiçdədi. Başqa cür hücumlar qura bilmirik. Murad da oyundan qopdu. Ramil də geriyə oynamağa başladı. Məşqlərdə etdiyimizin əksini gördük. Bu gün 10 nömrə Ozobiç xeyirli futbolçudu. Qol da yaratdı. Onun da gücü yetən dəqiqələr var.

ƏSƏD SEYİDOV