Bu gün nəinki "Qarabağ", ölkə futbolu üçün çox əhəmiyyətli gündü. Ona görə ki, Ağdam təmsilçisi Çempionlar Liqasının pley-off mərhələsinin ilk oyununda “Ferentsvaroş"un qonağı olacaq. Bəllidi ki, "köhlən atlar" Budapeşt səfərindən sərfəli nəticə ilə qayıtmaq üçün son ana qədər çarpışacaq.

Bəs komandamızı çətin səfər matçında nə qədər azarkeş dəstəkləyəcək?

Bu sualla "Qarabağ"ın mətbuat xidmətinin rəhbəri Anar Hacıyevə müraciət etdik. Klub rəsmisi "Football-plus.az"a açıqlamasında bu gün səhər saatlarına qədər 400 "Qarabağ" azarkeşinin bilet aldığını açıqladı. Əlbəttə, oyunun başlayacağı saata qədər bu sayın artması istisna deyil.

Xatırladaq ki, matçın keçiriləcəyi "Qroupama Arena"da azərbaycanlı tərəfdarlar üçün 1106 yer ayrılıb. Həmin biletlər “iTicket.az”da onlayn şəkildə satışdadı. Azarkeşlər əldə etdikləri vauçerləri stadionun “Gate 4”də yerləşən E sektorunun qarşısında biletə dəyişməlidi. Bu zaman şəxsiyyəti təsdiq edən sənəd üzərinizdə olmalıdı. Vauçerləri biletə dəyişmək üçün kassalar matçın start fitindən 2 saat öncə açılacaq. Biletin qiyməti 11 avrodu.

KƏNAN BAHADIR