"Qarabağ" Çempionlar Liqasının 2-ci təsnifat mərhələsinin cavab matçında "Linkoln Red İmps"i qəbul edəcək.

Bilindiyi kimi, iyulun 30-u, saat 20.00-da "Tofiq Bəhramov"da keçiriləcək oyunun biletləri iyulun 19-dan satışa çıxarılıb. Bəs, indiyə qədər neçə bilet sahibinə qovuşub? "Köhlən atlar"ın abrokuboklardakı növbəti ev oyununda da anşlaq olacaqmı?

Bu suallarla "Qarabağ"ın mətbuat xidmətinin rəhbəri Anar Hacıyevə müraciət etdik. O, "football-plus.az"a açıqlamasında artıq 16300 biletin satıldığını dedi.

Qeyd edək ki, biletlərin qiyməti müvafiq olaraq 5, 10, 20, 30, 75 və 100 manat təşkil edir. VVIP C və VVIP D sektorlara bilet alaraq, VIP Lounge üstünlüklərindən yararlanmaq istəyən azarkeşlər üçün biletlərin qiyməti isə 200 manatdı.

Azarkeşlər biletləri iTicket.az-ın satış məntəqələri (iTicket.az-da onlayn satış), "Qarabağ"ın Park Bulvardakı Fan-Şopu və Tofiq Bəhramov adına Respublika stadionunun kassalarından əldə edə bilər.

KƏNAN BAHADIR