Fərdi Kadıoğlunun ''Fənərbaxça'' karyerası başa çatmaq üzrədi. Türkiyəli futbolçunun premyer-liqa təmsilçisi ''Brayton''a uzun müddətdi gözlənilən keçidi demək olar, tamamlanıb.

İstedadlı futbolçu dünən saat 20.30 civarında İstanbulun ''Atatürk'' hava limanında görüntülənib. ''Fənərbaxça''dan verilən açıqlamada qeyd olunub ki, Kadıoğlu transferin son detallarını həll etmək və tibbi müayinədən keçmək üçün Londona yollanıb. Müqavilənin ''5+1'' illik olacağı və 24 yaşlı futbolçunun illik 3,5 milyon avro qazanacağı gözlənilir.

''Fənərbaxça''nın qazanacağı məbləğ hələ rəsmi olaraq açıqlanmayıb. Amma bu keçidin təxminən 30-35 milyon avroya bitəcəyi gözlənilir. Bəzi mənbələr 40 milyon avro və sonrakı satışdan pay versiyasını ortaya atır. Bununla da Fərdi Türkiyə çempionatından ən bahalı qiymətə satılan futbolçuya çevriləcək. Tarixin ən bahalı türkiyəli oyunçusu olması üçün isə transfer ən azı 35 milyon avroya bitməlidi. Çünki 2015-də ''Barselona'' Arda Turana görə ''Atletiko''ya 34 milyon avro ödəmişdi.

Qeyd edək ki, 2018-ci ildən ''sarı-lacivərdlilər''in şərəfini qoruyan Kadıoğlu 203 rəsmi oyuna çıxaraq 18 qol, 22 məhsuldar ötürmə ilə fərqlənib.

ƏLİ