Bir sıra önəmli isimlərlə danışıqlar aparmasına baxmayaraq hələ də transferdə fanatlarını intizarda saxlayan ''Fənərbaxça'' ilə bağlı nəhayət, mühüm bir xəbər var.

Belə ki, İstanbul nəhəngi ''Əl-Nəssr''in kolumbiyalı hücumçusu, Kriştiano Ronaldonun komanda yoldaşı Con Duranı icarə əsasında Türkiyəyə gəlməyə razı salıb. Özü də bu xəbəri elə-belə mənbə yox, tanınmış insayder Fabritsio Romano yayıb.

Şayiələrə inansaq, son günlər Kolumbiyada olan ''Fənər'' rəsmiləri istedadlı futbolçunu razı salmaq üçün dəridən-qabıqdan çıxıblar.

Yeni idman direktoru Devin Özək Duran ilə üzbəüz görüşərək ona klubun layihəsini və gənc oyunçunun bu layihədəki rolunu anladıb. Elə baş məşqçi Joze Mourinyo da onunla telefonda görüntülü danışaraq Istanbula dəvət edib. 21 yaşlı futbolçu yenidən Avropaya qayıdaraq ''Fənərbaxça''da oynamağa razılıq verib. Amma bu, yalnız işin yarısıdı. ''Əl-Nəssr'' ilə də anlaşmaq lazımdı.

Hər halda klub ötən mövsümün qış fasiləsində 77 milyon avroya ''Aston Villa''dan transfer etdiyi forvardı havayı buraxmayacaq.

Xatırladaq ki, ''sarı-lacivərdlilər'' ötən qış ''Əl-Nəssr''dən Anderson Talişkanı transfer etmişdilər. Bu klub faktiki olaraq Duranı Talişkanın yerinə heyətə qatmışdı. Amma göründüyü kimi ''Fənər'' bu futbolçuya da göz qoyub. Duran geridə qoyduğumuz mövsümdə ''Aston Villa'' və ''Əl-Nəssr''də ümumilikdə 47 rəsmi oyuna çıxaraq 24 qol vurub.