Bu gün avrokubokların 2025/26 mövsümündə ilk qalib müəyyənləşəcək: İtaliyanın Udine şəhərində Avropa Superkuboku (AS) oyunu keçiriləcək.

"Football-plus.az" xəbər verir ki, ümumilikdə 50-ci olacaq dueldə PSJ və “Tottenhem” qarşılaşacaq.

Avropa Superkuboku
PSJ (Fransa) - Tottenhem (İngiltərə)
Hakim və köməkçiləri: Joao Pineyro, Bruno Alveş Jezuş, Lusiano Mayya (hamısı Portuqaliya), Elçin Məsiyev (Azərbaycan).
VAR hakimləri: Fabio Melo, Tyaqo Martinş (hər ikisi Portuqaliya), Pol van Boekel (Niderland).
Cəzalı: Joao Neveş (PSJ).
Avrokuboklarda qarşılaşmayıblar
13 avqust. Udine (İtaliya), “Friuli” stadionu.

PSJ Fransada ilkə imza ata bilər
İndiyədək heç bir komanda AS-də qalib gəlməyib. PSJ ötən mövsüm Çempionlar Liqasında (ÇL) ilk dəfə qalib gəlib. Luis Enrikenin komandası mayın 31-də Münhendə keçirilən finalda “İnter”i 5:0 hesabı ilə məğlub edib. Parislilər tarixində 2-ci dəfə AS-də oynayacaqlar. Bu avrokubokda ilk dəfə 1997-ci ildə çıxış edən PSJ-nin debütü çox uğursuz alınıb. Qeyd edək ki, onda UEFA superkubokunun qalibi iki oyunluq mübarizədə müəyyənləşirdi. Evdə “Yuventus”a 1:6 hesabıyla uduzan paytaxt klubu İtaliyadakı cavab görüşündə 1:3 hesablı məğlubiyyətdən qaça bilməyib. İki oyunun ümumi nəticəsinə əsasən, rəqibinə 7 top fərqi ilə boyun əyən PSJ turnirin tarixinə ən böyük hesabla uduzan klub kimi düşüb.

Paytaxt təmsilçisi AS matçında iştirak edən yeganə Fransa klubudu. PSJ-nin Udinedə qalib gələcəyi halda Fransanın superkuboku qazanan 13-cü ölkə olacağını da qeyd edək.

Parisliləri 2023-cü ildən çalışdıran Luis Enrike ilə bağlı faktlar daha cəlbedicidi. O, superkuboku oyunçu və məşqçi kimi başı üzərinə qaldıran 5 futbol adamından biridi. Luis Enrike bu planda Karlo Ançelotti, Xosep Qvardiola, Dieqo Simeone və Zinəddin Zidanın sırasına daxildi. 55 yaşlı ispaniyalı 1997-ci ildə “Barselona”nın futbolçusu, 2015-ci ildə isə baş məşqçisi kimi sevinib. Luis Enrikenin Avropada Qvardioladan sonra mövsümü iki dəfə “trebl” ilə başa vuran ikinci məşqçi olduğunu da vurğulayaq. O, ilk dəfə 2014/15 mövsümündə “Barselona” ilə “qızıl het-trik” edib.

AS-də debüt
“Tottenhem” bu turnirdə ilk dəfə çıxış etmək hüququ qazanıb. İngiltərə təmsilçisi superkubok uğrunda yarışacaq 42-ci klub olacaq. Xatırladaq ki, paytaxt komandası ötən mövsüm Avropa Liqasının (AL) finalında “Mançester Yunayted”dən üstün olub. Mayın 21-də İspaniyanın Bilbao şəhərində keçirilən finalda Brennan Consonun vurduğu yeganə qol “Tottenhem”ə tarixində 4-cü dəfə avrokubokun qalibi olub. Qeyd edək ki, londonlular 142 illik tarixində 3 dəfə AL-də (UEFA Kubokunda), 1 dəfə isə Kuboklar Kubokunda qalib gəliblər. Artıq AL-də qələbə sayına görə “Atletiko”, “İnter”, “Yuventus” və “Liverpul”a çatan paytaxt təmsilçisi yalnız rekordçu “Sevilya”dan (7 qələbə) geri qalır.

“Tottenhem” İngiltərənin AS-də iştirak edəcək 8-ci təmsilçisi olacaq. Bu yeni rekorddu. İndiyədək bu turnirdə İtaliya və İspaniyanın hərəyə 7 klubu iştirak edib. “Tottenhem” PSJ-yə üstün gələcəyi halda İngiltərənin 7-ci qalib komandası olacaq. “Futbolun vətəni”ni uğurla təmsil edənlərin “Liverpul”, “Nottingem Forest”, “Aston Villa”, “Mançester Yunayted”, “Çelsi” və “Mançester Siti” olduğunu da xatırladaq.

Ümumiyyətlə, İngiltərə klubları indiyə qədər 20 Superkubok matçına çıxıb və 10 dəfə qalib gəliblər. Adalılar hər iki göstəricidə 32 oyun və 17 qələbə ilə İspaniyadan geri qalırlar. Maraq üçün premyer-liqa təmsilçilərinın AS-in son 6 oyunundan üçündə qalib gəldiyini də bildirək.

“Tottenhem” 41 ildən sonra qitə arenasında ilk uğurunu qazanıb. Paytaxt komandası UEFA Kubokunda 1971/72 və 1983/84 mövsümlərində də qalib gəlmişdi. “Mahmızlar”ın tarixində sonuncu titulunu İngiltərə Liqa Kubokunun 2007/08 mövsümündə qazandıqlarını da xatırladaq. Amma bu da var ki, londonlular daxili yarışlarda fiaskoya uğrayıblar. Komandanın premyer-liqanı 17-ci yerdə başa vurması rəhbərliyi baş məşqçi vəzifəsinə 2023-cü ildə təyinat alan Angelos Postekoğlunu istefaya göndərməyə vadar edib. Yunanıstanda doğulsa da, ömrünün çox hissəsini Avstraliyada keçirən 59 yaşlı mütəxəssisi yerini Tomas Frank tutub. Başqa sözlə, “Brentford”dan dəvət edilən 51 yaşlı danimarkalı çalışdırıcının rəsmi debütü məhz AS-in PSJ ilə oyununa təsadüf edəcək.

Avropada ikinci vacib oyun
Superkubok matçı Bakı vaxtı ilə saat 23.00-da başlayacaq. Udine şəhərindəki “Friuli” stadionu uzun illər oyuna səhnə olan Monakodan təşkilatçılıq hüququ alınandan sonra matçın keçiriləcəyi 13-cü arena olacaq. Son illər ÇL və AL-in qaliblərinin duelləri Praqa, Kardiff, Tiflis, Tronheym, Skopye, Tallin, İstanbul, Budapeşt, Belfast, Helsinki, Pirey və Varşavada baş tutub.

Bu dəfə diqqətlər Udine şəhərinə yönələcək. “Udineze”nin rəqiblərini qəbul etdiyi “Friuli” 25144 yerlikdi. 1976-cı ildə istifadəyə verilən idman qurğusunda 1990-cı və 2013-16-cı illərdə yenidənqurma işləri görülüb. “Friuli” gənclər arasında AÇ-2019-un final mərhələsinin oyunlarını qəbul edən 6 stadiondan biri olub. Qitə çempionatının finalı da daxil olmaqla 4 oyununun həyəcanı bu arenada yaşanıb. Başqa sözlə, “Friuli” Avropa futbolunda ikinci vacib oyunu qəbul edəcək.

Maraqlıdı...
ÇL-in (Çempionlar Kubokunun) qalibləri Avropa Superkubokunda indiyədək baş tutan 49 dueldən 29-nu qələbə ilə başa vurublar. AL-in qalibi kimi titula sahib çıxan sonuncu komanda “Atletiko” olub. Madridlilər 2018-ci ildə həmyerliləri “Real”a 4:2 hesabıyla qalib gəliblər.

Avropa Superkubokunun statistikası
Klublar üzrə
qələbə
6 - Real
5 - Barselona, Milan
4 – Liverpul
3 – Atletiko
2 – Anderlext, Ayaks, Bavariya, Valensiya, Çelsi, Yuventus

iştirak
9 – Barselona, Real
7 - Milan, Sevilya
6 – Liverpul
5 - Bavariya, Çelsi
4 – Mançester Yunayted, Portu
3 – Atletiko, Ayaks

Ölkələr üzrə
qələbə
17 – İspaniya (Real – 6, Barselona – 5, Atletiko – 3, Valensiya – 2, Sevilya - 1)
10 – İngiltərə (Liverpul – 4, Çelsi - 2, Aston Villa, Mançester Yunayted, Mançester Siti, Nottingem Forest - 1)
9 – İtaliya (Milan – 5, Yuventus – 2, Latsio, Parma - 1)

iştirak
32 - İspaniya (Barselona, Real - 9, Sevilya – 7, Atletiko – 3, Valensiya – 2, Saraqosa, Vilyarreal - 1)
20 - İngiltərə (Liverpul – 6, Çelsi - 5, Mançester Yunayted - 4, Nottingem Forest – 2, Arsenal, Aston Villa, Mançester Siti - 1)
14 - İtaliya (Milan – 7, Yuventus – 2, İnter, Latsio, Parma, Sampdoriya, Atalanta - 1)

Oyunçular üzrə
qələbə
5 - Daniel Karvaxal (Real – 2014, 2016, 2017, 2022, 2024), Luka Modriç (Real – 2014, 2016, 2017, 2022, 2024)
4 - Daniel Alveş (Sevilya – 2006, Barselona – 2009, 2011, 2015), Paolo Maldini (Milan – 1989, 1990, 1994, 2003), Kərim Benzema (Real – 2014, 2016, 2017, 2022), Toni Kroos (Bavariya – 2013, Real – 2014, 2017, 2022)

iştirak
6 - Daniel Karvaxal (Real - 2014, 2016, 2017, 2018, 2022, 2024), Luka Modriç (Real - 2014, 2016, 2017, 2018, 2022, 2024),
5 - Daniel Alveş (Sevilya – 2006, 2007, Barselona – 2009, 2011, 2015), Kərim Benzema (Real – 2014, 2016, 2017, 2018, 2022), Toni Kroos (Bavariya – 2013, Real – 2014, 2017, 2018, 2022), Paolo Maldini (Milan – 1989, 1990, 1993, 1994, 2003)

oyun
8 - Alessandro Kostakurta, Roberto Donadoni (hər ikisi “Milan”)
7 - Paolo Maldini, Daniele Massaro, Mauro Tassotti (hamısı “Milan”)
6 - Franko Barezi (Milan), Ari Haan (Ayaks, Anderlext), Daniel Karvaxal, Luka Modriç (hər ikisi “Real”)

qol
3 - Oleq Bloxin (Dinamo K), Devid Feyrklaf, Terri Makdermott (hər ikisi “Liverpul”), Radamel Falkao (Atletiko), Ari Haan (Ayaks, Anderlext), Lionel Messi (Barselona), Herd Müller (Bavariya), Rob Rensenbrink, Fransua van der Elst (hər ikisi “Anderlext”)

Məşqçilər üzrə
qələbə
5 - Karlo Ançelotti (Milan – 2003, 2007, Real – 2014, 2022, 2024)
4 - Xosep Qvardiola (Barselona – 2009, 2011, Bavariya - 2013, Mançester Siti - 2023)

Oyunçu və məşqçi kimi
qələbə
Karlo Ançelotti (1990; 2003, 2007, 2014, 2022, 2024), Xosep Qvardiola (1992; 2009, 2011, 2013, 2023), Dieqo Simeone (1999; 2012, 2018), Luis Enrike (1997; 2015), Zinəddin Zidan (1996, 2002; 2016, 2017)