Kriştiano Ronaldo karyerasında növbəti uğuruna nail olub. “Əl-Nəsr”in hücumçusu Səudiyyə Ərəbistanında 2024/25 mövsümünün ən yaxşı futbolçusu seçilib.

40 yaşlı forvard azarkeşlər tərəfindən mövsümün ən yaxşısı adına layiq görülüb. Ronaldo mövsüm ərzində 15 dəfə matçın ən yaxşı oyunçusu seçilib. O, Səudiyyə Ərəbistanı Pro Liqasında 30 oyun keçirib, 25 qol vurub və turnirin bombardiri olub.
Portuqaliya millisinin oyunçusunun çempionatın 27-ci turunun “Ər-Riyad”la oyununda (2:1) cərimə zərbəsindən vurduğu qol 2024/25 mövsümünün ən baxımlı qolu kimi tanınıb.

Beləliklə, Ronaldo mövsümü üç fərdi mükafatla başa vurub.

Yeri gəlmişkən, ulduz futbolçu növbəti mövsümündə bir çox matçda iştirak etməyəcək. Bu barədə Səudiyyə Ərəbistanından olar jurnalist Falah Əl-Qahtani məlumat yayıb. 40 yaşlı futbolçu komandaya yenicə təyin olunan baş məşqçi Jorje Jezuşla görüş keçirib. Tərəflər daha az önəm kəsb edən oyunlarda Ronaldonun iştirak etməməsi barədə razılığa gəliblər. Həmçinin görüşdə oyunçunun yaşı ilə bağlı yükün azaldılmasının vacibliyi də qeyd olunub.

Qeyd edək ki, Kriştiano ötən mövsüm yorğunluq səbəbindən bir neçə matçı buraxmalı olmuşdu.

Əl-Qahtaninin məlumatında məşqçi heyəti və futbolçunun qərarına əsasən, Ronaldonun yeni mövsümdə azı oyunların 25 faizində iştirak etməyəcəyi də qeyd olunur. Məqsəd onun zədə riskini azaltmaq və dünya çempionatına maksimal formada hazır olmasını təmin etməkdi.

Yeri gəlmişkən, Səudiyyə Pro Liqasında yeni mövsüm avqustun 21-də start götürəcək.