Hazırda Səudiyyə Ərəbistanında top qovması Kriştiano Ronaldonun beynəlxalq karyerasına mənfi təsir etmir. “Əl-Nəsr”in hücumçusu Portuqaliya yığmasına çağrılıb.

"Football-plus.az" xəbər verir ki, 38 yaşlı ulduz futbolçu milli komandanın AÇ-2024-ün seçmə mərhələsinin martın 23-də və 26-da uyğun olaraq Lixtenşteyn və Lüksemburqa qarşı keçirəcəyi oyunlar üçün iştirak ərizəsinə daxil edilib. Lixtenşteynlə matç yığmanın ispaniyalı yeni baş məşqçisi Roberto Martines üçün debüt olacaq.

Yeri gəlmişkən, Ronaldo Portuqaliya yığmasında sonuncu oyununu DÇ-2022-nin 1/4 finalında Mərakeşə qarşı (0:1) keçirib. O, indiyədək milli formada 196 oyuna 118 qol vurub. Kriştiano hər iki göstəricidə ölkə rekordçusudu.