"Əlbəttə, biz bura sadəcə oynamağa gəlməmişik" - Valdas Dambrauskar
"Sabah"ın baş məşqçisi Valdas Dambrauskas Konfrans Liqasının 2-ci təsnifat mərhələsinin ilk oyunları çərçivəsində "Petrokub"a qarşı keçirəcəkləri səfər oyunu haqda danışıb.
"Football-plus.az" xəbər verir ki, mütəxəssis görüşdən əvvəl təşkil olunan mətbuat konfransında Moldova təmsilçisini təhlil etdklərini deyib:
“Bizi çox maraqlı oyun gözləyir. Rəqibi təhlil etmişik, son oyunlarını izləmişik. "Petrokub" maraqlı komandadı, daha çox müdafiəyə meylli oynayırlar. Futbolçuları çox kompaktdı, meydanda nə edəcəklərini bilirlər. Məncə, evdə və səfərdə bir qədər fərqli oyun sərgiləyirlər. Evdə daha çox pressinq edirlər, meydanın hər yerində rəqiblə birə-bir oynamağa çalışırlar. Səfərdə isə taktiki yanaşmaları bir az fərqlidir. Avrokuboklarda favorit olmur, burada həmişə bütün gücünlə mübarizə aparmalısan. Bir an belə oyunun taleyini həll edə bilər".
O, Moldovada yaxşı oyun nümayiş etdirmək və sərfəli nəticə qazanmaq istədiklərini bildirib:
"Əlbəttə, biz bura sadəcə oynamağa gəlməmişik. Məncə, “Sabah” artıq elə bir səviyyəyə çatmalıdı ki, harda oynamasından asılı olmayaraq, hər oyuna qalibiyyət üçün çıxsın. Biz də bunu etməyə çalışacağıq".
Valdas Dambrauskas Avropa Liqasının 1-ci təsnifat mərhələsinin "Selye" ilə oyunlarından nəticə çıxardıqlarını söyləyib:
"Selye” ilə keçirdiyimiz iki oyun bizə oyunumuzu anlamaq, səhvlərimizi dərk etmək və nələri düzəltməli olduğumuzu görmək baxımından çox şey qazandırdı. Avropa futbolunda həmişə olduğu kimi, nəticəni xırda detallar həll edir. Meydana çıxırsan və döyüşürsən, amma sonda kiçik məqamlar, köklənmə oyunun taleyini müəyyən edir. Ümid edirəm ki, bu dəfə hər şey bizim xeyrimizə olacaq”.
