Bir müddət əvvəl Braziliya yığmasının baş məşqçi postuna təyin olunan Karlo Ançelotti 2014-cü ildə İspaniyada vergi fırıldaqçılığına yol verməkdə günahkar sayılıb.

"Football-plus.az" xəbər verir ki, italiyalı mütəxəssisə bir il şərti həbs cəzası kəsən məhkəmə onun üzərinə 386 min 362 avro cərimə qoyub, həmçinin üç il ərzində vergi güzəştlərindən və subsidiyalarından məhrum edib.

Məhkəmənin qərarı
Ançelottinin günahı bundan ibarətdi ki, 2014-cü ildə İspaniyada imic hüquqlarının satışından əldə etdiyi qazancı vergi bəyannaməsində göstərməyib, yalnız “Real”dan aldığı əməkhaqqını göstərməklə kifayətlənib. Məhkəmə bildirir ki, mütəxəssis bu yolla 1,2 milyon avrodan artıq vergi ödəməkdən yayınıb. Madrid məhkəməsi baş məşqçini birillik şərti cəzaya layiq görüb. İspaniya qanunvericiliyi cəza iki ildən az olarsa və şəxs əvvəllər məhkum olunmayıbsa, onun “dəmir barmaqlıqlar” arasına göndərilməsini nəzərdə tutmur.

Bundan başqa, Ançelotti 386 min 362 avro cərimələnib və üç il ərzində dövlətin vergi güzəştlərindən və subsidiyalarından yararlanmaq haqqını itirib. Amma onun üzərindən 2015-ci ildə vergidən yayınması ilə bağlı ittiham götürülüb.

Mütəxəssis özü günahını boynuna almır, bildirir ki, İspaniyada vergi rezidentliyi üçün zəruri olan 183 gün keçirməyib. O həm də müsahiblərini vergi orqanlarına təqdim olunan bəyannamələri səhv tərtib etməkdə suçlayır.

Madrid prokurorluğu əvvəlcə Ançelotti üçün 4 il və 9 aylıq həbs, həmçinin 3 milyon avro cərimə tələb edirdi. İttiham tərəfi iddia edir ki, baş məşqçi mürəkkəb trast sistemi və ofşor şirkətlər vasitəsi ilə imic hüquqlarının satışından əldə etdiyi qazancı gizlədib, bu isə ona İspaniyada vergi ödənişindən yayınmağa imkan verib.

İlk belə hal deyil
İspaniyadakı vergi məsələləri başqa məşhur idmançıların da başına problem açıb. Məsələn, 2016-cı ildə Lionel Messi və atası Xorxe 2007-09-cu illər aralığında 4,1 milyon avro məbləğində vergi ödənişindən yayınmaqda suçlanırdı. Ata-oğul Beliz və Uruqvayda olan ofşor şirkətlərin xidmətindən yararlanmaqla imic hüquqlarının satışından əldə olunan pulu gizlətmişdi. Nəticədə hər biri 21 aylıq həbs cəzası aldı və cərimələndi: Leo 2 milyon, atası isə 1,5 milyon avro ödəməli oldu. Onlar həbsxanaya düşmək əvəzinə vergi cinayətlərinin və faizlərin kompensasiyası kimi 5 milyon avro ödədilər.

2019-cu ildə Kriştiano Ronaldo 2011-14-cü illər aralığında vergi ödəməkdən yayındığına görə 18,8 milyon avro cərimə ödəməyə razı oldu. Portuqaliyalı ulduz imic hüquqlarının satışından qazandığı pulu gizlətmək üçün Britaniyanın Virgin adalarındakı və İrlandiyadakı ofşor şirkətlərin köməyindən yararlanmışdı.

Real həbs əvəzinə onun üçün 23 aylıq şərti cəza təyin olundu. Günahını boynuna alan Ronaldo işlərin yoluna düşməsi üçün cəriməni də ödədi.