Hazırda ''Eyupspor''u çalışdıran Arda Turanla bağlı xəbər var.

Yaxın keçmişin tanınmış futbolcularından biri 2015 və 2016-cı illərdə, yəni ''Atletiko'' və ''Barselona''da oynadığı dönəmdə ümumilikdə 975 min avro dəyərində vergidən yayınmaqda şübhəli bilinirdi.

Barselona məhkəməsində bu prosesə yekun vuruldu. Arda sözügedən dönəmdə həqiqətən də vergidən yayındığını boynuna aldı. Məhkəmə 37 yaşlı mütəxəssisə birillik həbs cəzası verib. Amma bu, şərti xarakter daşıyır. Həm də İspaniya qanunvericiliyinə görə həbs cəzası 2 ildən az olduqda günahkar şəxs bu cəzanı həbsxanada keçirmir. Arda 2 il ərzində yenidən vergidən yayınacağı halda artıq həbs ediləcək.

Bundan başqa türkiyəli futbol adamı 2015-ci il üçün 303 min avro, 2016-cı il üçün isə 330 min avro olan cəzasını ödəyib. Yerdə qalan 617 min avroluq cəzanı isə o, 6 ay ərzində geri qaytarmaq öhdəliyini üzərinə götürüb.

ƏLİ