Yeni mövsümə hazırlaşan ''Real''da baş məşqçi Xabi Alonso ilə prezident Florentino Peres arasında transfer mövzusunda fikir ayrılığı yaşanıb. İspaniyalı mütəxəssis rəhbərlikdən ən az bir mərkəz yarımmüdafiəçisi tələb edib. Alonso istədiyi futbolçuların siyahısını da hazırlayıb.

O, ''İnter''dən Nikola Barella, ''Ştutqart''dan Angelo Ştiller, eləcə də ''Alkmaar''dan Kees Smitin adını rəhbərliyə bildirib və bu 3 oyunçudan birinin alınmasını istəyib. Ancaq ''Mundo Deportivo'' nəşrinin iddiasına görə Peres bu oyunçuların hamısını rədd edib və Alonsoya '' artıq bahalı transfer olmayacaq, istisna yalnız Rodri üçün edilə bilər'' cavabını verib. Göründüyü kimi Peres yalnız ''Mançester Siti''nin ulduzu üçün pul xərcləməyə hazırdı.

Bu isə Alonsonun planlarını pozub və onların arasında soyuqluq yaranıb. ''Real'' bu yay 4 futbolçunun transferinə artıq 182 milyon avro xərcləyib və rəhbərliyin fikrincə, bu, heyətin komplektləşməsi baxımından yetərli məbləğdi.