''Bayer-04'' Ten Haqın ilk oyununda gənclər önündə rüsvay oldu
Xabi Alonso dönəmindən sonra Erik ten Haqı baş məşqçi postuna gətirən ''Bayer-04'' bu mütəxəssis ilə ilk yoxlama oyununda şok bir fiasko ilə qarşılaşıb.
"Football-plus.az" xəbər verir ki, Braziliyada toplanışda olan Leverkuzen təmsilçisi Rio de Janeyroda ''Flamenqo'' ilə üz-üzə gəlib və 1:5 hesabı ilə darmadağın olub. Özü də söhbət ''Flamenqo''nun əsas yox, U-20 komandasından gedir!
2024-cü ildə bundesliqa çempionu olmuş komanda braziliyalı gənclərdən artıq ilk yarıda 4 cavabsız qol buraxdı. Düzdü, ədalət naminə deyək ki, ''aspirinlər'' heç də ideal heyətlə oynamırdılar. İlk ''11-lik''də yalnız Flekken, Hofmann, Artur, Adli və Bonifeysi əsas oyunçu saymaq olardı. Digərləri futbol ictimaiyyətinə tanış deyildi. Ten Haqın qapıçı Flekken ilə Bonifası artıq 36-cı dəqiqədə əvəzləməsi diqqət çəkdi.
İkinci hissədə Caka, Frimponq kimi isimlər də meydana çıxdı. Komandanın yeganə qolunu 17 yaşlı vinger Montrell Kalbret vurdu. Xatırladaq ki, daha öncə ''Mançester Yunayted''də uğursuzluğa düçar olan Ten Haq yeni işinə iyulun 1-dən başlayıb. Təcrübəli məşqçi futbol dünyasını şoka salan bu nəticəni belə şərh etdi:
''Çox bərbad nəticədi. Amma düzünü desəm, yoxlama oyunlarında nəticə məni qətiyyən maraqlandırmır. Sözsüz ki, bizim kimi səviyyəli komanda bu cür hesabla uduzmamalıdı. Mənim üçün heç bir oyunçumuzun zədə almaması nəticədən daha önəmli idi. Oyunun zamanı da düzgün seçilməmişdi. Daha gec saatlarda oynaya bilərdik''.
Digər xəbərlər
