3 gün sonra “Qarabağ” Avropa Liqasının H qrupunda ən vacib oyununa çıxacaq.

“Köhlən atlar”ın rəqibi Almaniyanın “Bayer-04” klubu olacaq. Leverkuzen təmsilçisi 11 oyundu ki, məğlub olmur. “Qara qırmızılar” bundesliqada sonuncu turda “Volfsburq”un qonağı oldu. Xabi Alonsonun komandası çətin keçən matçda 2:1 hesablı qələbə qazandı. İspaniyalı mütəxəssis qarşılaşmada aşağıdakı “11-liy”ə güvənmişdi:

1.Lukaş Qradeçkiy, 12. Edmon Tapsoba, 4. Conatan Tah, 2. Yosip Stanişiç (6. Odilon Kossunu, 88), 20. Aleks Qrimaldo, 34. Qranit Caka, 25. Ezekiel Palasios, 30. Jeremi Frimponq (19. Neytan Tella, 88), 21. Amin Adli (10. Florian Virç, 66), 7. Yonas Hofmann (11. Nadim Amiri, 88), 22. Viktor Bonifase.

“Bayer-04” 3-4-2-1 taktiki sxemindən istifadə edir. Komanda əsas gücü cinah yarımmüdafiəçilərindədi. Hücumlar yarımmüdafiənin dayağından qurulur. Caka və Palasios kimi futbolçular topu özündə yaxşı saxlamağı bacarır. Hər iki oyunçu mütləq şəkildə ötürmələrini sağ və ya sol cinahda yer alan vingerlərə edir. Rəqibin müdafiəçilərinin “dəri kürə”ni geri qaytarması da məqsədə uyğun deyil. Çünki 2 pleymeykerdən biri mütləq şəkildə cərimə meydanı həndəvərində olur. Onlar uzaqdan zərbələrdən istifadə edərək rəqib qolkiperləri narahat edirlər. “Bayer-04”in məğlubiyyətsizliyinin səbəbi də məhz bu məqamdı. Leverkuzen təmsilçisinin heyətində 4 güclü pleymeyker var: Adli, Virç, Hofmann və Amiri. Onların hər biri yüksək texnikaya və dəqiq zərbəyə malikdi.

Bu komandaya qarşı oynamağın tək yolu var. Əks-hücum taktikasından istifadə etmək lazımdı. Sürətli sağ/sol vingerləri və son nöqtəni qoymağı bacaran hücumçusu olan komanda “Bayer-04” qarşısında şanslıdı. “Qarabağ” da məhz belə futbolçulara sahibdi. Əminim ki, solda Abdullah Zubir, sağda Leandro Andrade, hücumun mərkəzində Juninyo Almaniya təmsilçisi ilə hər iki oyunda özlərini göstərə biləcək.

İLKİN SULTANLI