İyulun 9-u səhər saatlarında yayılan xəbər avtoidman dünyası həvəskarlarının böyük marağına səbəb oldu. İş ondadı ki, “Red Bull” son 20 ili bu komandanın rəhbəri kimi keçirən Kristian Horneri qovdu.

"Football-plus.az" xəbər verir ki, komandada söz sahibi olanlar ona heç izahat verməyi də lazım bilmədi. İyulun 10-da “Red Bull”un əməkdaşları ilə görüşən Horner qovulma qərarının onu şoka saldığını gizlətməyib:

Hornerin qovulmasının mümkünlüyü haqda xəbərlər bir neçə gün əvvəldən yayılmışdı. Bəzi həmkarlarımızın iddiasına inansaq, “Red Bull”un yaradıcısı Ditrik Mateşits 2022-ci ildə dünyasını dəyişəndən sonra 51 yaşlı funksioner daha böyük səlahiyyət sahibi olub ki, bu da Avstriya komandasında heç də hamının xoşuna gəlməyib. Narazılar sırasında Maks Ferstappenin də adı çəkilir. Və onun mövqeyi bu məsələdə vacib rol oynaya bilər. Bundan başqa, Hornerin adı ətrafındakı daimi qalmaqallar (ötən il xanım əməkdaşlardan biri ilə bağlı seksual qısnamada ittiham olunurdu), həmçinin “Red Bull”un son vaxtlar dünya çempionatında zəif nəticə göstərməsi də qovulmaya töhfə verib. Avstriya komandası hazırda 172 xalla Mühəndislər kubokunda 4-cü yerdə qərarlaşıb. Lider “Maklaren”in isə 460 xalı var.

“Daily Mail”in yazdığına görə, Hornerin qovulması ilə bağlı qərar yekdilliklə qəbul olunub. Son söz baş direktor Oliver Mintslaffa (o həm də “Red Bull” konserninin icraçı direktorudu) məxsus olsa da, komandanın həmsahibləri – Çelerm Yuvidya və Mark Mateşits Kristianın getməsinin əleyhinə olmayıb.

Artıq “Red Bull”un yeni rəhbəri də məlumdu. Buna qədər “Reysinq Bullz”da analoji postu tutan 48 yaşlı fransalı Loran Mekis Avstriya komandasının uğurları üçün çalışacaq.

Artıq neçə aydı “Red Bull”un əsas pilotu, dördqat dünya çempionu Maks Ferstappenin də bu komandadan ayrılacağı, konkret “Mersedes”ə gedəcəyi ilə bağlı xəbərlər yayılıb. Jurnalist Feliks Herner iyulun əvvəlində yazmışdı ki, Maksın bir ayağı Almaniya komandasındadı. Onun dediyinə görə, 2028-ci ilə qədər qüvvədə olan müqavilədə niderlandlı pilota “Red Bull” ilə əməkdaşlığa vaxtından əvvəl son qoymağa imkan verən bənd var. “Auto Motor and Sport” nəşri isə yazırdı ki, 27 yaşlı pilot yalnız Horner qovulacağı və ya səlahiyyətlərinə məhdudiyyət qoyulacağı təqdirdə komandadan ayrılmayacaq. Ancaq bu qərar “Red Bull”un strateji yenilənməsinin bir hissəsi olmalıdı, daha sadə kadr yerdəyişməsi yox.

Ferstappenin komandada qalıb-qalmayacağını demək hələ ki çətindi. Aydındı ki, onun “Mersedes”ə yollanmaq arzusu təkcə Horner amili ilə bağlı deyil. Ancaq indi Maksın “Red Bull” ilə fikir ayrılıqlarından ən azı biri aradan qalxdı.

Horner son vaxtlar “Red Bull”u tərk edən ikinci böyük simadı. 2024-cü ildə dahi mühəndis Edrian Nyui də Avstriya komandasından ayrılmışdı. O, elə həmin ilin sentyabrında “Aston Martin”ə keçdi, bu ilin yazında isə səlahiyyətlərinin icrasına başladı. Ferstappen də “Red Bull”u tərk etsə, onda komanda son onillikdə ona şöhrət qazandıran üç məşhur adamı qısa müddətdə itirəcək.

Horneri qeyd-şərtsiz “Red Bull”un əfsanəsi adlandırmaq olar. Britaniyalı komandanın təməlini qoyanlardan biridi – 2005-ci ildə kürsüyə əyləşib, ilk və fasiləsiz rəhbəri olub. Daha bir maraqlı məqam: o vaxt yenicə 30 yaşını tamamlayan Kristian “Formula-1” dünyasında ən gənc boss idi.

“Red Bull” pilotları Hornerin rəhbərliyi altında 8 dəfə çempion olub – bu qələbələrin dördü Sebastyan Fettelin, dördü isə Maks Ferstappenin payına düşür. Bundan başqa, Avstriya komandası göstərilən zaman kəsiyində 6 dəfə Mühəndislər kubokunu qazanıb.

“Red Bull”un baş direktor Oliver Mintslaff Hornerlə belə vidalaşıb: