Azərbaycanın avrokuboklardakı təmsilçiləri üçün yay əcəb macəralı başlayıb. “Sabah”ın Masazırda “Selye”yə necə dramatik şəkildə uduzduğunu gördüz. Bu haqda “Futbol+”də çox yazdıq, hər yönə toxunduq.

Yazılanlardan, deyilənlərdən aydın olur ki, “Sabah”ın vəziyyəti pis olsa da, çıxılmaz deyil. Yəni bu gün “Selye”nin “Sabah” önündə hesabdan başqa hansısa ciddi üstünlüyü yoxdu. Bir qədər cəsarət, özünəinam, ulduzların parlaq oyunu lazımdı ki, “bayquşlar” bu mərhələni keçə bilsin. Ona qalsa, ötən ilin iyulunda səfərdə Hayfa “Makkabi”si ilə qarşılaşan “Sabah”ın uğur şansı bundan qat-qat aşağı dəyərləndirilirdi. Amma komanda çıxdı, oynadı, vətənə 3:0 hesablı qələbə ilə qayıtdı. Məhz o səfər qələbəsi Krunoslav Renduliçin çalışdırdığı komandanı növbəti mərhələyə daşıdı. Düzünə qalsa, cavab görüşündəki 3:6-nın bu günə qədər də heç bir məntiqi izahı yoxdu. Deməyim odu ki, “Sabah” üçün də səfər kompleksi yoxdu, cümə axşamı mübarizənin axarını dəyişə bilər. Görünür, məhz bu tutarqaya söykənən klub rəhbərliyi, daha dəqiqi, piar-media işi ilə məşğil olanlar klubun “feysbuk” hesabında ötən il səfərdə “Makkabi”yə vurulan qolları paylaşır. O mənada ki, çox da dərd etməyin, bir dəfə bacarmışıqsa, ikinci dəfə də bacararıq. İstəməyən kor olsun! Təki siz bacarın, biz də mədh edək!

Hə, “Sabah”ın məsələsi aydındı, ilk mərhələni keçəcəyi şübhə doğurmayan “Qarabağ”ın da, bəxtinə çətin rəqib düşən, amma gözdən-könüldən uzaq Türkiyədə güclü rəqiblə - “Aris”lə duelə hazırlaşan “Araz-Naxçıvan”ın da. Amma “Zirə”... “Zirə” deyib də, nəfəs dərməyə məcburam.

İyunun sonunda “qartallar” “Qarabağ”la yoxlama oyunu keçirdi və darmadağın oldu. Oyundan sonra Rəşad Sadıqova Rafael Utziqlə bağlı da sual verildi. Baş məşqçinin dediklərindən belə aydın oldu ki, transferə çıxarılan braziliyalı vingerə görə hansısa klubdan rəsmi təklif gözləyirlər. Təklif gəldi gəldi, gəlmədisə, onda Utziq məşqə çıxmadığı hər gün üçün cərimələnəcək.

Həmin oyunun üstündən iki həftə keçib və indi vəziyyətin daha dramatik, çıxılmaz olduğu aydındı. Hətta o dərəcədə ki, “Zirə” FİFA-ya müraciət etməyə məcburdu. Müraciətin məzmununa gəlincə... Sən demə, braziliyalı mövsümün sonuna bir həftə qalmış klub rəhbərliyi ilə görüşərək, gələn il iyunun 30-na qədər qüvvədə olan müqaviləsinin qarşılıqlı razılıq əsasında pozulmasını, transferə çıxarılmasını istəyib. Zorla gözəllik olmur! Məhz bu məqamı nəzərə alan “Zirə” də ona deyib ki, yaxşı, gedirsən-get, ancaq səni istəyən klub masanın üzərinə 200 min dollar qoymalıdı. Utziq o gedən gedib – nə izi var, nə də sorağı. Ötən ilin yanvarından “Zirə”nin düşərgəsində olan braziliyalı indi bu komandaya münasibətdə, yumşaq desəm, yaxşı hərəkət etmir. Əli-qolu bağlı olan “qartallar” faktiki seytnotdadı. Axı sabah UEFA-ya Konfrans Liqasında iştirak üçün ərizə təqdim olunmalıdı. Təbii ki, braziliyalını siyahıya salmaq mümkün deyil. Çünki o, bir daha “Zirə”nin şərəfini qorumaq istəmir. Bildiyimə görə, klubun yeni və daha keyfiyyətli futbolçu almaq üçün də pulu yoxdu. Kimsə Utziqə görə “Zirə”nin “elçi daşının üstündə otursaydı”, tələb olunan 200 min dolları versəydi, bu başqa məsələ. Amma indi nə Utziq var, nə müştəri var, nə də pul!

Klubun bu məsələdə yaxasına kənara çəkməsi, “bizdə heç bir günah yoxdu” deməsi də yaxşı variant deyil. Faktiki adam iki aya yaxındı “radardan itib”, onunla bağlı daha tez “həyəcan təbili çalmaq” lazım idi. Amma “qartallar” indi – ilk avrokubok oyununa bir həftə qalmış əl-ayağa düşüblər, nəyəsə nail olmaq istəyirlər. Hələ Salifu Suma ilə bağlı qeyri-müəyyənlik də var ki, mən heç o məqama toxunmaq istəmirəm. Nəyin bazarlığı gedir, bazarlıq niyə bu qədər uzanır – heç cür aydın deyil. Suma gedərsə, belə qısa müddətdə hansı futbolçu onu layiqincə əvəz edəcək – bu da aydın deyil. Aydın olan bir həqiqət var: artıq iyulun 23-də “Hayduk”la oyuna çıxmaq lazımdı. Son mövsümdə Xorvatiyada möcüzə nəticəsində çempionluğu əldən verən, Bakıda büdrəməyi ağlının ucundan belə keçirməyən “Hayduk”la.

Çox ümid edirəm ki, Rəşad Sadıqovun düşüncə qatında hansısa anlamadığımız mətləblər yatır, bəlkə B planı da var, C planı da, hətta D planı da. Amma belə planlar yoxdusa, hər şey kənardan çox qorxunc görünür.

HUŞƏNG