Müqavilə ilə ''Qalatasaray''a məxsus olan Nikolo Zanyolo ötən mövsüm icarə əsasında ''Fiorentina''da oynayarkən yol verdiyi qalmaqallı hərəkətə görə para cəzası alıb.

"Football-plus.az" xatırladır ki, hadisə mayın sonlarında baş vermişdi. İtaliyanın gənclər liqasının yarımfinalında ''Fiorentina'' ilə ''Roma'' üz-üzə gəlmişdi.

Bilindiyi kimi Zanyolo uzun illər ''Roma''nın şərəfini qoruyub. O, 2022/23-ün qış transfer dönəmində çox hay-küylü şəkildə ''Roma''dan ayrılaraq İstanbul nəhənginə transfer olunmuşdu. Həmin vaxtdan ''Roma''dan acıqlı olan 26 yaşlı futbolçu hirsini bu komandanın gənclərindən cixmaq qərarına gəlmişdi. O, qeyd olunan tarixdə ''Fiorentina'' ilə ''Roma''nın gəncləri arasındakı matçı izləmiş, daha sonra içkili vəziyyətdə ''Roma''nın paltardəyişmə otağına daxil olaraq iki futbolçuya fiziki xəsarət yetirmiş, eləcə də oranı ayaq yolu kimi istifadə etmişdi. ''Roma''nın hadisə ilə bağlı rəsmi açıqlamasından sonra İtaliya Futbol Federasiyası araşdırmanın başlandığını açıqlamışdı. Qurum artıq araşdırmanı başa vuraraq Zanyoloya 15 min avro cəza verib.

Qeyd edək ki, ötən mövsümün ilk dövrəsini ''Atalanta'', ikinci dövrəsini isə ''Fiorentina''da keçirən tanınmış futbolçunun qarşıdakı mövsümü elə ''Qalatasaray''da keçirmək ehtimalı yaranıb. Zanyolo məşqlərdə çox istəkli görünür. O, ''Ümraniyespor''a qarşı yoxlama oyununda da yaxşı təsir bağışlayaraq qollardan birinin müəllifi oldu. Daha öncə bu futbolçunun bu yay yenidən icarəyə veriləcəyi deyilsə də, Okan Buruk onu komandada saxlaya bilər.