İtaliya çempionatının 14-cü turunun son oyununda ''Roma'' ''Atalanta''nı qəbul etdi.

Əla formada olan Berqamo təmsilçisi çətin səfərdə 2:0 hesabı ilə üstün olaraq qələbə seriyasını davam etdirdi. Matçın ən çox müzakirə edilən futbolçusu isə Nikolo Zanyolo oldu.

Bilindiyi kimi Zanyolo bir neçə il ''Roma''nın şərəfini qoruyub və ulduzu da məhz burda parlayıb. Amma o, 2022/23-ün qış fasiləsində çox qalmaqallı şəkildə paytaxt təmsilçisindən ayrılaraq ''Qalatasaray''a yollanmışdı. Ardınca ''Aston Villa''da da top qovan 25 yaşlı futbolçu bu yay ''Atalanta''ya transfer olundu. Zanyolo ''Roma'' ilə qarşılaşmanın 64-cü dəqiqəsində yerli fanatların etirazları, fit sədaları və təhqiramiz ifadələri altında meydana çıxdı.

Bu şərtlər altında oynamasına baxmayaraq o, 89-cu dəqiqədə qol vuraraq yekun nəticəni müəyyənləşdirdi. Adətən futbolçular sabiq klublarına qol vurduqda hörmət əlaməti olaraq buna sevinmirlər. Amma Zanyolo sanki bütün həyatıboyu bu anı gözləyirmiş. O, qolu çox çılğın şəkildə qeyd edərək hətta formasını da çıxardı və buna görə sarı vərəqə aldı.

Zanyolonun bir neçə ildən sonra ''Roma''dan bu cür şəkildə qisas alması və bunu nümayişkəranə şəkildə qeyd etməsi İtaliyada, eləcə də sosial şəbəkələrdə gündəm oldu.

ƏLİ