''Qalatasaray'' fanatlarının Viktor Osimhenin transferinin bitməsini gözləməkdən az qala gözlərinin kökü saraldı. Amma Türkiyə çempionu düyünə düşən bu transferi heç cür tamamlaya bilmir.

Öncəki günlərdə İstanbul nəhənginin transferi bitirməyə yaxın olduğu deyilirdisə, Neapoldan gələn son xəbərlər çətin ki, ''sarı-qırmızılar''a könül verənlərin ürəyincə olsun. ''Qalatasaray''ın 75 milyon avroluq sərbəstqalma məbləğinin ödəmə planı heç cür ''Napoli'' rəhbərliyini qane etmir. Əvvəlki xəbərlərdə qeyd olunurdu ki, ''Cim-Bom'' 40 milyon avronu nəğd, qalan 35 milyon avronu isə bankdan təminat kağızı ilə birlikdə 2027-ci ilə qədər ödəməyi təklif edib. Amma ''Napoli''nin prezidenti Aurelio De Laurentis ənənəsinə sadiq qalaraq yenə işi çıxılmaz həddə çatdırıb. Başqan istanbullulardan həm qalan məbləğin 2026-cı ilin sonuna qədər ödənilməsini tələb edib, həm də Osimhenin sonrakı satışından pay istəyib. Bu şərt qarşısında şoka düşən ''Qalatasaray'' rəsmiləri De Laurentisin istəyini dərhal geri çeviriblər.

Bütün bunlar azmış kimi Fransanın ünlü ''Ekip'' nəşri PSJ-nin Osimhen uğrunda mübarizəyə qoşulduğunu iddia edib. Fransızların xəbərinə görə parislilərin İdman direktoru Luis Kampos forvardın ətrafı ilə əlaqə qurub. Kampos daha öncə 2021/22-nin ikinci dövrəsində ''Qalatasaray''da Burak Elmasın prezidentliyi dönəmində baş məsləhətçi kimi çalışıb. ''Napoli'' artıq yeni mövsümün hazırlıqlarına start verib. Osimhen isə ''Napoli''yə sağlamlıq durumu ilə bağlı kağız göndərərək hazırda məşqə çıxmağa hazır olmadığını bildirib. Bu arada ''Napoli'' rəsmiləri Türkiyənin ''Sabah'' nəşrinə transferdəki son durumla bağlı məlumat verərkən bir maraqlı detalı açıqlayıblar.

Onlar ''Qalatasaray'' tərəfdən təminat sənədi verilməsi ilə bağlı məlumatın tamamilə yanlış olduğunu bildiriblər. Onlar eyni zamanda transferin baş tutmalı ehtimalını 30 faiz civarında qiymətləndiriblər.