''Qalatasaray''ın Fernando Musleranın ayrılmasından sonra qapıçı axtarışları davam edir.

Bu arada İspaniya mətbuatının iddiasına görə Türkiyə çempionu ''Barselona''da əsas qapıçı statusunu itirən Mark-Andre ter Ştegenə rəsmi təklif irəli sürüb. Belə ki, ''Sport'' nəşri İstanbul nəhənginin rəsmilərinin ünlü almaniyalı qapıçının məxsus olduğu menecerlik şirkətinin bir nümayəndəsi ilə İstanbulda görüş keçirdiyini iddia edib. Həmin görüşdə təcrübəli qapıçıya illik 5 milyon avro maaş təklif olunub və Çempionlar Liqasında ciddi hədəflər uğrunda mübarizə aparacaq heyətin qurulacağına söz verilib. Ancaq ''Barsa''da illik 6,3 milyon avro qazanan 33 yaşlı qapıçı ''Qalatasaray''ın təklifini bəyənməyərək geri çevirib! Ümumiyyətlə, bu qapıçının gələcək taleyi maraq doğurur.

Bu günlərdə ''Barsa''nın çalışdırıcısı Hans Diter Flik Ter Stegenlə görüşərək ona klubda artıq nəinki birinci, heç ikinci qapıçı da olmadığını çatdırıb. Yeni mövsümdə Kataloniya nəhəngində ilk iki qapıçı statusunu Voytsex Şçenşnı ilə Xoan yerinə yetirəcək. Ter Ştegen isə yalnız üçüncü qapıçı olacaq.

Gələn yay dünya çempionatı olacağını nəzərə alsaq, Ter Ştegenin gələcəyi ilə bağlı hansı qərarı verəcəyi maraqla gözlənilir.