“Biz belə cəsur qərarlar verməkdən heç vaxt çəkinməmişik. Arda gənc, hirsli, iddialı və qalib mentallığına malik bir futbol adamıdı. Eynilə mənim kimi. “Eyüpspor”u elitaya daşıdı və superliqadakı ilk mövsümündə “avrokubok zonası”ndan cəmi 1 xal geri qalaraq 6-cı pilləni tutdu. Ardanı bura gəlməyə razı salmaq heç də çətin olmadı. Bizə nə müharibə, nə də maliyyə ilə bağlı suallar verdi. Sadəcə, futbol, oyunçular və komanda haqda danışdıq. Telefonda bircə dəfə danışmağımız yetərli oldu. Mənə “hazıram. Bu, mənim üçün önəmli fürsətdi və onu dəyərləndirmək istəyirəm. Narahat deyiləm. Yüksək səviyyəli məşqçi olmaq istəyirəm. “Şaxtyor” bu baxımdan karyeramda önəmli bir addım ola bilər” dedi. “Şaxtyor” son 25 ildə təkcə yaxşı oyunçulara sahib olmadı, həm də önəmli mütəxəssislərlə çalışdı. Luçesku, De Zerbi, Luis Kastro, Fonseka... İndi də Arda ən yaxşılardan birinə çevrilmək üçün hər şeyə sahibdi. O, müdafiədə Simeone, hücumda Luis Enrike kimidi. Futbolçunun ruhunu, psixoloji durumunu gözəl hiss edir. Bunu hər məşqçi bacarmır. Həm də yüksək səviyyəli köməkçilərə malikdi. Ona tam güvənirik və klubumuzun tarixində yeni bir səhifə açmağa hazırıq. Bu mövsüm üçün hədəf AL-də əsas mərhələyə yüksəlmək və çempion statusunu qaytarmaqdı. Müharibəyə gəlincə, dəyişən bir şey yoxdu. Hər gün hücumlara məruz qalırıq. Bu şərtlərdə işləmək çətindi. Ukraynadakı müharibə artıq əvvəlki qədər müzakirə olunmur. Çünki indi dünyada başqa müharibələr də var. Amma ilk gündə durum necə idisə, indi də elədi. Savaşın tezliklə bitəcəyinə ümid edirik. Çünki bu şərtlər altında hamıya çətindi. Oturub müzakirələr aparılmalı və sülh sazişi imzalanılmalıdı. Bura Braziliyadan və başqa ölkələrdən də gələnlər olur. Onlar üçün müharibə tam yad bir durumdu. Ona görə də Kiyevə və ya başqa bir şəhərə bomba atılanda bunu onlara izah etmək çətin olur. Müharibədə qardaşlarını, dostlarını, yaxınlarını itirənlər var. Bu, çox acı bir durumdu. Buna baxmayaraq, oyunçular son dərəcədə peşəkardılar və hər gün əllərindən gələni edirlər. Savaş artıq həyatımızın bir parçasına çevrilib. Amma həyatımızın dəyişməsinə imkan verməməli və güclü olmalıyıq. Biz Ukrayna xalqı, futbolu və ordusu üçün savaşırıq”.