Futbol dünyasının böyük maraqla gözlədiyi “Viktor Osimhen yeni mövsümdə hansı klubda oynayacaq” sualının cavabı hələ də tapılmır. Ancaq bu mövzuda yeni xəbərlər var.

Gün ötdükcə “Qalatasaray”ın bu məsələdə mövqeyi daha da güclənir. Hər halda, bunu Türkiyə mətbuatı iddia edir. Nigeriyalı forvard “Qalatasaray”da nağıllardakı kimi mövsüm keçirsə də, məlum olduğu kimi, müqüvilə ilə “Napoli”yə məxsusdu. Ona dünyanın dörd bir tərəfindən təkliflər olsa da, Osimhen hələ də qərar verməkdə çətinlik çəkir.

İddialara inansaq, “Qalatasaray” ulduz futbolçuya illik 16-23 milyon avro arası maaş təklif edib. Səudiyyə Ərəbistanını saymasaq, bu, Osimhenə gələn hələ ki ən sərfəli təklifdi. Çünki premyer-liqa nəhəngləri ona illik maksimum 10 milyon avro, “Yuventus” isə 12 milyon avro təklif edir. Şayiələrə inansaq, 26 yaşlı futbolçu “Qalatasaray” rəhbərliyinə “Napoli ilə anlaşın, mən gəlməyə razıyam” mesajını göndərib.

Bu məsələnin ən problemli tərəfi məhz elə “Napoli”nin tələb etdiyi 75 milyon avroluq təzminatdı. Futbolçunun klubla müqaviləsində məhz bu məbləğ sərbəstqalma maddəsi kimi göstərilib. Osimhenin neapollularla müqaviləsi 2026-ya qədər nəzərdə tutulub. Klubu ilə birillik müqaviləsi qalan futbolçuya görə isə heç kim bu boyda təzminat ödəmək istəmir. “Qalatasaray” əvvəlcə 50 milyon avro, sonra sponsorların dəstəyi ilə 60 milyon avro və sonuncu variant kimi 65 milyon avro təklif etsə də, “Napoli”nin prezidenti Aurelio De Laurentis 75 milyon avrodan aşağı düşmək istəmir. Bu məbləği ödəməyə razı olan yeganə klub “Əl-Hilal”dı. Səudiyyə Ərəbistanı nəhəngi italiyalılara 75 milyon avronu 3 hissəyə bölərək ödəməyi təklif edib. Əslində tərəflər arasında çoxdan razılıq əldə olunub. Amma dərd orasındadı ki, Osimhen qətiyyən bu ölkəyə yollanmaq istəmir. Hətta “Əl-Hilal”ın illik 40 milyon avro maaş olmaqla dördillik astronomik təklifi də Osimheni razı salmaq üçün kifayət etməyib!

Yeri gəlmişkən, bu məsələdə daha bir mühüm detal var. İyulun 15-də “Napoli” ilə Osimhen arasındakı müqqavilədə yer alan sərbəstqalma maddəsi qüvvədən düşəcək. Əsas həngamə məhz ondan sonra qopacaq. Böyük ehtimalla iyulun 15-nə qədər Osimhen heç bir klubla müqaviləyə imza atmayacaq.

Bu arada Alvaro Moratanın yeni klubunun adına aydınlıq gəlib. Təcrübəli ispaniyalı forvard karyerasını həmyerlisi Sesk Fabreqasın çalışdırdığı A seriyası təmsilçisi “Komo”da davam etdirəcək. Rəsmi açıqlamanın ən qısa müddətdə veriləcəyi gözlənilir. Xatırladaq ki, “Qalatasaray” Moratanı yanvarda “Milan”dan birilliyə icarəyə götürmüşdü. Əslində Okan Buruk onun komandada qalmasını istəyirdi. Amma təcrübəli futbolçu Türkiyəyə uyğunlaşa bilmədiyi üçün İtaliyaya qayıtmaq qərarına gəlib. İddialara görə İstanbul nəhəngi bu transferdən 1 milyon avro qazanacaq. Amma digər tərəfdən “Cim-Bom” qışda keçidin detalları ilə bağlı rəsmi məlumat verərkən birillik icarə haqqı kimi “Milan”a 6 milyon avro ödəniləcəyini açıqlamışdı. Ona görə də bu məbləğin aqibətinin necə olacağı bəlli deyil.

Morata Türkiyə karyerasında 16 oyuna çıxaraq hesabına 7 qol, 3 məhsuldar ötürmə yazdı və bu qısa müddət ərzində iki titul qazandı. Bu arada ötən mövsümü icarə əsasında əvvəlcə “Atalanta”da, sonra “Fiorentina”da keçirən Nikolo Zanyolonun “Qalatasaray”a döndüyünü və məşqlərdə iştirak etdiyini bildirək. İtaliyalı futbolçuya “Torino” və “Vilyarreal” maraq göstərsə də, “Qalatasaray”a hələ ki heç bir klubdan rəsmi təklif gəlməyib.